Thursday, September 21, 2017

බුදු සසුනට වින කටින්නේ අන්‍ය ආගමිකයන් නොවේ.

ශ්‍රී ලංකාවේ පවතින සංස්කෘතික සහ සාමාජීය ව්‍යුහය බුදු දහම මුලික කරගෙන ගොඩ නැගී ඇත. සිංහල බෞද්ධයා පමණක් නොව සිංහල කතෝලිකයාද සිය පැවැත්ම තුල පෙන්නුම් කරනුයේ බුදු දහමේ ආභාශයයි. අප වෙත කතෝලික දහම පැමිණි යුරෝපීය සමාජයේ සංස්කෘතියට වඩා හාත්පසින් වෙනස් සංස්කෘතියක් සිංහල කතෝලිකයාට ඇත. සමහරක් චාර්යා රටාවන් වෙනස් වුවද ප්‍රධාන වශයෙන් කතෝලිකයා වෙත පවතිනුයේ බෞද්ධ සංස්කෘතිය වෙතින් ශික්ෂණය වූ පවුල මුලික සංස්කෘතියකි. මේ අනුව ගත් කල මුළු රටේම සංස්කෘතිය පදනම් වන්නේ බුදු දහම කේන්ද්‍ර කරගෙන බව පෙනෙයි.

නමුත් මේ වන විට දේශීය සංස්කෘතියේ  බෞද්ධ පදනම වෙත එල්ල වී ඇති තර්ජනය ඇති මහත්ය. නිදහසින් පසුව මෙරට තුල ඇතිවූ ඊනියා බෞද්ධ ප්‍රබෝධය අවසානයේ මාරක ප්‍රහාරයක් එල්ල කර ඇත්තේ රටේ බෞද්ධ සංස්කෘතියට ය. ශ්‍රී ලංකාව බ්‍රිතාන්යෙන් නිදහස ලැබීමෙන් අනතුරුව බල ලෝභී දේශපාලන නායකයන් රොත්තකගේ ග්‍රහණයට හසුවිය. මේ ඊනියා නායකයින්  බලයට පැමිණීම සඳහා මෙරට පවතින බෞද්ධ පදනම නින්දිත ලෙසින් ගණිකා වෘතියේ යෙදවූ බව මෑත ඉතිහාසය අධ්‍යනය කරනා විට හොඳින්ම පෙනී යයි. බලලෝභී නායකයන් විසින් බෞද්ධ සමාජය ප්‍රධාන අවස්ථා හතරකදී දරුණු පිරිහීමකට ලක් කර ඇත.

1. බණ්ඩාරනායක විසින් බලයට පැමිණීම සඳහා පංච මහා බලවේගය නම්වූ සන්නාමය යටතේ සංඝ සමාජය අලෙවිකරණය සඳහා යොදවා ගැනීම.
2. භික්ෂු විනයට කෙලෙසකින්වත් නොගැලපෙන ලෙසින් දේශපාලන පක්ෂයක් අටවාගෙන ඡන්ද අපේක්‌ෂකයන් ලෙස භික්‌ෂූන් 260 ක්‌ පමණ මැතිවරණයට තරඟ කරවීම 
3. ගලගොඩ අත්තේ ඥානසාර හිමියන් ප්‍රමුඛ මැර කල්ලියකට දේශපාලන අනුග්‍රහය ලබාදීමෙන් රටේ සුලු ජාතික කණ්ඩායම් පීඩනයට  කිරීම.
4. දේශපාලන නායකයින් විසින් අමු අමුවේ සිදු කරනා ලද චන්ද දුෂණ සහ මුල්‍ය අවභාවිතාවන් නිසා අධිකරණයෙන් වරදකරුවන් කරනාලද නිලධාරීන් වෙනුවෙන් පෙනීසිටීමට සංඝයා වහන්සේලා යොමු කරවා සංඝ සමාජය අවඥාවට ලක් කිරීම 

සිල් රෙදි වංචාව නිසා සිරගතවුවන් වෙනුවෙන් සංඝයා වහන්සේලා පාරට ඇද දමනා ලද දේශපාලන නායකයින් විසින් රටේ බෞද්ධ පදනමට ඇති කර තිබෙනා හානිය සුළුපටු නොවෙයි. මේ හේතුවෙන් වර්තමානයේදී, බුදු සසුනේ මුර දේවතාවුන් වන සංඝයා වහන් සේලා වෙත සමාජයෙන් විශාල විරෝධතාවයක් එල්ල වී ඇති බව පෙනෙන්නට තිබේ. එම විරෝධතාවයේ පරිමාණය සමාජ ජාලා වෙත යොමු කරනු ලබන ලිපි සහ චායා රුප ආශ්‍රිත නිර්මාණ තුලින් මොනවට පෙන්නුම් කෙරෙයි. සංඝ සමාජය වෙත විරෝධතාවය දක්වන්නන්  අතර අන්‍යාගමික පිරිස් අවම වන  අතර එහි මුලටම සිටිනුයේ බෞද්ධ පිරිස්ය.  තවද උපතින් බෞද්ධ නමුත් මේ වනවිට නිරාගමිකයන බවට හැරී සිටිනා  සෑහෙන පිරිසක් ද වෙති.

සිය දුෂණ වසා ගැනීමට අද දින  සංඝයා වහන්සේලා මහමගට ඇද දමනා ලද පිරිස විසින්ම සිය දේශපාලන යාන්ත්‍රණයට එරෙහි වූ සංඝයා වහන්සේලාට එලව එලවා පහර දුන් ආකාරය මතක් කර දීම වටියි. 2004 පාර්ලිමේන්තු මැතිවරණයෙන් පසුව කථානායක තේරීමේ චන්ද විමසීමේදී විරුද්ධ පාක්ෂික අපේක්ෂකයා වූ වී ජ මු ලොකුබණ්ඩාර දිනවීමට කටුයතු කරනා ලද එවකට පාර්ලිමේන්තු මන්ත්‍රී වරුන් වූ සංඝයා වහන්සේලාට පහරදී ඉන් දෙනමකගේ රහසඟ මිරිකා රෝහල් ගතවන තත්වයට පත් කරනා ලද්දේ මේ පිරිස විසින්මය. ඉනිඳු  නොනැවතී රට පුරා සංඝයා වහන්සේලාට  හක් බෙල්ලන්, හක්කු, සිප්පි යනුවෙන් අවමන් කරමින් පෝස්ටර් අලවන ලද්දේද මේ පිරිසමය.  

මේවා සිදුකරනා ලද්දේ බෞද්ධයන් වෙනුවෙන් දිවිහිමියෙන් පෙනී සිටිනා බව සැමවිට කෑමොර දෙන දේපාලන නායකයන් මිස අන්‍යාගමික පිරිස් නොවෙති.  

Sunday, September 17, 2017

පිණ්ඩපාතයේ වැඩමකර ලක්ෂ එක්දහස් හතළිහක් සෙවිය හැකිද?

සිල් රෙදි වංචා කරුවනට අධිකරණය නියෝග කරනා ලද දඩ මුදල මේ වනවිට දේශපාලනික අවස්ථාවාදීනට කදිම දඩ බිමක් නිර්මාණය කර දී ඇත. තමන්ගේ මැතිවරණ ව්‍යාපාරය වෙනුවෙන් රාජ්‍ය මුදල් අවභාවිතාවට හවුල්වී සිර දඬුවම් ලබන්නාවූ රාජ්‍ය නිලධාරීන් වෙනුවෙන් පෙනී සිටීම කල යුත්තේ ඔවුන් දඬුවම් ලැබීමට පසුව නොවේ. සත්‍ය වශයෙන්ම ඔවුන් ගැන කැක්කුමක් තිබුනේ නම් නඩුව විභාග කරනා අවස්ථාවේදී අදාළ නිලධාරීන් වෙනුවෙන් පෙනී සිටීමේ අවකාශය උදක්ම තිබිණ. නමුත් කලබලවී ඇත්තේ දඬුවම් ලැබීමෙන් අනතුරුව වීම විහිළුවකි.

ලබාදී ඇති දඩ මුදලද ලේසි පහසු එකක් නොවේ. එක අයෙකුට රුපියල් ලක්ෂ 520කි ඉහලම මට්ටමේ රාජ්‍ය නිලධාරියෙකුගේ වැටුප රුපියල් ලක්ෂයකට ආසන්න ගණනකි. ඒ අනුව ගන්නා කල දඩ මුදල වසර 43 ක සම්පුර්ණ වැටුපට සමානය. මෙවන් මුදලක් ගෙවීම දුෂිතයකු නොවනා රාජ්‍ය නිලධාරියකුට සිහිනයක්ම පමණි. අදාළ නිලධාරීන් දුෂණයට පොළඹවන ලද දේශපාලන අධිකාරීනට තමන්ගේ බැංකු ගිනුමින් මේ මුදල ගෙවීමට හැකියාවක් සමහර විට තිබිය හැක. නමුන් එය ගෙවා දැමීම සියතින් වල කපා ගැනීමකි. මන්ද යත් ඔවුන්ගේද නීත්‍යානුකුල ආදායම තුලින් අදාළ මුදල ගෙවීම කෙලෙසකින් වත් සාධාරණීකරණය කල නොහැකි බැවිනි. මුදල ගෙවා දමන්නේ නම් ආදායම ලැබුණු ආකාරය ද  යුතු වන්නේය. පසුගිය රජය සමයේ වරප්‍රසාද ලද ඉහල ආදායම් සහිත ව්‍යාපාරිකයන් ද තමන්ගේ රහසිගත දේශපාලන සම්බන්ධතා එළිදරව් වන බියෙන් මුදල් ලබා දීමට ඉදිරිපත් නොවනු ඇත.

එසේනම් මේ මුදල ගෙවා දැමීමට ඇති එකම ක්‍රමය වන්නේ හිඟන විජ්ජාවය. රට වටේ කැට හොල්ලා මුදල් ලැබුණු බව ප්‍රකාශ කර තමන්ගේ කළු සල්ලි වලින් මුදල ගෙවා දැමීමය. එයද හිතනා තරම් පහසු කාරණයක් නොවන්නේ මේ වෙනුවෙන් ස්වෙච්චා සේවකයන් සොයා ගැනීමේ අපහසුතාවයයි. රැස්වීමකට සහභාගී වන්නට බත් පැකට්ටුව, අරක්කු කාල සහ රුපියල් දාහක් බලාපොරොත්තු වන පාක්ෂිකයන් අතරින් කැට හොල්ලන්නට පිරිස එකතු කර ගතහොත් සිදුවනුයේ කැට අතුරුදහන් වීම පමණි.

ඉහත කාරනා නිසා හිඟන විජ්ජාව ක්‍රියාත්මක කිරීමට යොදාගෙන ඇත්තේ සංඝයා වහන්සේලා වය. උන්වහන්සේලා පිණ්ඩපාතේ වැඩම කර පළමු දිනයේදී රුපියල් එක්ලක්ෂ නවදහස් එකසිය දහයක (රු. 109,110) මුදලක් එකතු කර ගන්නා ලද බව අන්තර්ජාලයේ විවිධ තැන්හි වාර්තා වෙයි. මේ මුදල ගෙවීමට ඇති දඩ මුදල හා සසඳන කල ඉතාමත් සුළු මුදලකි. මේ ආකාරයට මුළු දඩ මුදල් ගෙවීමට නම් එක දිගට දින 953 නැතහොත් වසර දෙකකුත් මාස හතක කාලයක් පිණ්ඩපාතේ වැඩම කිරීමට සිදුවනු ඇත. 

Monday, September 11, 2017

අනුනට සාර්ථකත්වය උගන්වන වංචනිකයන් - 1

යුග ගණනාවක් පුරා සිය මුලික අවශ්‍යතා සපුරාගෙන සරලව දිවි ගෙවූ මිනිසා සංකීර්ණ ජීවන රටාවකට යොමු වුයේ කාර්මික විපලවයෙන් පසුවය. කාර්මික විප්ලවය මිනිසා වෙත බොහෝ පාරිභෝගික භාන්ඩ රැගෙන  ආවේය. මේ පාරිභෝගික භාන්ඩ වෙත ලොල් වූ මිනිසා ඒවා හැකි තරමක් තමන් සතු කරගැනීමට තරඟයකට එළඹුණි. එයටම සමගාමීව වැඩවසම් ක්‍රමය සහ රාජාණ්ඩු ක්‍රමය බිඳ වැටීම තුල මිනිසාට විශාල නිදහසක්ද ලැබුනේය. 

මේ නිදහස් වාතාවරණය තුල සමාජයේ ඕනෑම සාමාජිකයකුට සිය වෙහෙස මගින් ඉහලට ගමන් කිරීමට අවකාශ ලැබිණ. ඉන් ඉක්බිතිව මිනිසා තුල එකිනෙකා පරදවා ඉහලට නැගීමේ ආශාව ඇතිවිය. වැඩි භෞතික වස්තුන් රැස් කරගන්නා පුද්ගලයා සාර්ථක පුද්ගලයකු වශයෙන් හැඳින්වින.මේ නිසා සෑම දෙනාම සාර්ථකත්වය සොයා තරඟයකට පිළිපන්නේය.

තරඟය ඉතාමත් දරුණු එකක් විය. සුළු පිරිසක් තරඟය ජය ගන්නා විට අති බහුතරයක් දෙනා පරාජිතයන් බවට පත් වුහ. නමුත් තවමත් පරාජිතයා තුල තරඟය ජයගන්නා අරමුණ පැවතිණ. 

මෙයින් ඇති කරනා ලද  රික්තය තුල පරාජිතයන් සඳහා සාර්ථකත්වයට මාවත දේශනා කරනා සාස්තෘවරු බිහි විය. ඔවුන් අසාර්ථක මිනිසුනට සාර්ථකත්වයට මග දේශනා කළහ. වඩාත්ම සිත් ගන්නා සුළු කාරණය නම මේ සාස්තෘවරුන් ගෙන් බොහොමයක් දෙනා සාර්ථකත්වය දේශනා කිරීම පටන් ගන්නා අවධිය වන විට බෙහෙවින්ම අසාර්ථක මිනිසුන් වීමය. මිනිසා තුල පවතින සාර්ථකත්වයට ඇති ලෝභය නැතහොත් කෑදරකම මේ සාස්තෘවරුන් මහා ධනවතුන් බවට පත්කරලීය.

උදාහරණයක් වශයෙන් කිවහොත් දියුණුවේ රන් දොරටුව නමින් සිංහලට පරිවර්තනය කරනා ලද Law of Success කෘතියේ සම්පාදකවරයා වන නැපෝලියන් හිල් යනු එම පොත් පෙළ ලියනා අවදිය වන විට කිහිප වතාවක් බංකොලොත් වූ පුද්ගලයෙකි. මුල්‍ය වංචා වලට හසුවූ අයෙකි. නිසි අධ්‍යාපනය හෝ අවසරය නොමැතිව නීතිඥයකු ලෙසින් පෙනී සිටි වංචනිකයෙකි. සිය ජීවිත කාලය තුල තෙවරක් දික්කසාද වූ අයෙකි. නමුත් ඔහු විසින් සාර්ථකත්වය ගැන ලියනා ලද විවිධ පොත් මිලියන 20ත් 50ත් අතර ප්‍රමාණයයන ගෙන් විකිණීමෙන් අලෙවි වාර්ථා තබා ඇත.

සාර්ථකත්වය ගැන දේශනා පවත්වන බොහෝ දෙනෙකුගේ චරිතාපදාන නැපෝලියන් හිල් ට වෙනස් වනුයේ ඉතාමත් සුළු වශයෙනි.

සාර්ථකත්ව සාස්තෘන්ගේ පොත් කියවීමෙන් හෝ දේශනා වලට සවන් දීමෙන් සාර්ථකත්වයට පත්වූ අය ගැන දැනගන්නට නම් නැත. නමුත් දේශකයන් මහා ධනවතුන් වූ  බවට නම් කොතෙකුත් වාර්ථා ඇත. මේ පොත් වලින් මිලියන ගණනක් මිනිසුන් සුරංගනා කතා තුල අතරමං කර දමා ඇත. මිලියන ගණනක් ශ්‍රාවකයන් සහ පාඨකයන් මේ වංචනිකයන් ගේ තවත් වංචාවකට නොදැනුවත්වම සිය මුදල් පුජා කර ඇත.

"සාර්ථකත්වයට ඇති හොඳම මාර්ගය අනුන්ට සාර්ථකත්වයට මාර්ගය ඉගැන්වීමය"

Saturday, September 9, 2017

ලලිත් වීරතුංග ගෙන් රාජ්‍ය සේවය පාඩමක් ඉගෙන ගනියිද?

තිස් වසරක් ඇදීගිය ඊලාම් යුද්ධය නිමකිරීමට කැපවූ ප්‍රධාන චරිත තුනකි. හිටපු ජනාධිපති මහින්ද රාජපක්ෂ යුධ ක්‍රියාන්විතයට දේශපාලන නායකත්වය ලබා දෙන විට ජනරාල් ෆොන්සේකා හමුදා නායකත්වය සැපයුයේය. යුද්ධයක් පවතින කාල වකවානුවක රාජ්‍යතාන්ත්‍රික පරිපාලනය අත්‍යවශ්‍ය සාධකයකි. එම රාජ්‍යතාන්ත්‍රික පරිපාලනයහි නියමුවා වුයේ ලලිත් වීරතුංග හිටපු ජනාධිපති ලේඛම් වරයාය. 

අප දන්නා පමණින් ලලිත් වීරතුංග යනු අති දක්ෂ රාජ්‍ය නිලධාරියෙකි. ඔහු කෙතරම් දක්ෂයකු වුවද  මේ වන විට රාජ්‍ය මුදල් අවභාවිතාව යන චෝදනාව යටතේ වරද කරු බවට පත්ව සිර දඬුවම්  ලබා අවසන්ය. එම දඬුවම සම්බන්ධව ඕනෑ තරම් මාධ්‍ය වාර්තා පළවී ඇති හෙයින් ඒ ගැන තවත් පැහැදිලි කිරීම් අනවශ්‍යය.

රාජපක්ෂ දශකයේ දුෂණ චෝදනා රාශියක් අතරින් වරද කරු බවට පත් වන පළමු පුද්ගලයන් බවට වීරතුංග සහ පැල්පිට මහතුන් පත් වෙති. දේශපාලන අණ ක්‍රියාත්මක කරවීම ඔවුහු මේ අවාසනාවන්ත ඉරණමට පත් වීමට හේතුව ලෙසින් බොහෝ දෙනෙකු විසින් සරලව ප්‍රකාශ කරන්නේ වුවද තිරය පිටුපස ඇත්තේ සංකීර්ණ කථාවකි.

යුධ ජයග්‍රහණයෙන් අනතුරුව පවත්වන ලද 2010 ජනාධිපතිවරණයේදී මහින්ද රාජපක්ෂ මහතා ලබා ගත්තේ අති විශිෂ්ඨ ජයග්‍රහණයකි. එම අවධිය වන විට රාජපක්ෂ මහතා කිසි දිනෙක චන්දයකින් පරාජයට පත් නොවනු ඇති බව පොදු ජන මතය විණ. යුධ ජයග්‍රහණයෙන් අනතුරුව රාජපක්ෂ ජනාධිපති වරයා වටේ සිටි හෙන්චයින් විසින් ඔහුව මහ රජාට ඇන්දීමෙන් නොනැවතී සීතාම්බර පටයක් ද අන්දවා තිබිණ. 

රාජපක්ෂ පවුලේ පුතුන් , සහෝදරයන් පමණක් නොව ඔවුන්ගේ බිරින්දෑවරුන්ද රටෙහි පරිපාලනයට ඇඟිලි ගසන්නට පටන් ගන්නේද මෙම මැතිවරණයෙන් අනතුරුවය. සුළු කලෙකින් බිහිවුයේ රාජපක්ෂ පවුලේ අණ දේව නීතිය ලෙසින් පිළිගැනීමට බල කරනා කාලවකවානුවකි. රාජපක්ෂ පවුලේ හිතවතුන් රංචු පිටින් රාජ්‍ය ආයතන වල ඉහල පුටු වලට පත් කරනා ලද්දේද මේ වකවානුව තුළදීය. රාජ්‍ය සේවය තුලට ඉමහත් බලහත්කාරයක් ඇතිවන්නට පටන් ගත්තේද මේ මැතිවරණ ජයග්‍රහණයෙන් අනතුරුවය.

මෙම බලහත්කාරය මතින් රාජ්‍ය සේවකයාගේ කොන්ද බිඳ දමා තිබිණ. පාලකයන්ගේ දේශපාලන ව්‍යාපෘති ක්‍රියාත්මක කිරීම සඳහා රාජ්‍ය මුදල්  පරිමාණයෙන් අවභාවිතය සිදුවිණ. රාජ්‍ය ආයතන වල ඉහල පුටු දේශපාලන පත්වීම් නිසා ඔවුන්ගේ තනතුරු රක ගැනීමට නම් පාලකයන්ගේ ව්‍යාපෘති ක්‍රියාත්මක කිරීම අනිවාර්ය විය. ඒවා සඳහා නීති විරෝධී ක්‍රියාදාමයන් සිදුනොකරනා නිලධාරීන් වහාම තනතුරු වලින් පහ කෙරිණ. හොඳම උදාහරණය හිටපු අගවිනිසුරු ශිරාණි බණ්ඩාරනායක මැතිනිය තනතුරෙන් පහ කරනා ලද දුෂ්ඨ ආකාරයයි.

රජයේ ප්‍රසම්පාදන ක්‍රියාදාමයද  මුළුමනින් දුෂිත තත්වයකට ඇද වැටී තිබිණ. පාලකයන් විසින් තෝරාදෙන සැපයුම් කරුගෙන් සේවාවන් ලබා ගැනීම සඳහා ලිපිගොනු සකස් කිරීම සඳහා නිලධාරීනට සිදුව තිබිණ. දේශපාලනිකව පත්වීම ලද ආයතන ප්‍රධානීන්ගේ තනතුරු රැකගැනීම සඳහා විවිධ අවභාවිතාවන් කිරීමට පහල නිලධාරීනට බල කෙරිණ. එවන් අවභාවිතාවනට සහය දෙන පහල නිලධාරීනට පමණක් උසස්වීම් සහ වෙනත් ප්‍රතිලාභ ලැබිණ. ආයතන ප්‍රධානීන්ගේ දුෂණ ක්‍රියාදාමයන්ට සහය නොදෙන සහ විරුද්ධ නිලධාරීන් දුෂ්ඨ ලෙසින් පලිගැනීමට ලක් කෙරිණ. විවිධ බොරු චෝදනා නගා සේවයෙන් පහකිරීම සහ තනතුරු වලින් ඉවත් කිරීම සිදු කෙරිණ.

වංචා දුෂණ වලට විරුද්ධව සිය පෑන මෙහෙයවූ මාධ්‍යවේදීන් ඝාතනයට ලක්විය. තවත් සමහරුන් අතුරුදහන් විය.  මාධ්‍යවේදීන් පසුපස හඹා ගියේ පැරා මිලිටරි කණ්ඩායම් බවට වාර්ථා පළවිණ. රාජ්‍ය අංශය තුල පමණක් නොව රට පුරාම භීෂණකාරී මානසික තත්වයක් (fear psychosis) ගොඩනගා තිබිණ.

මෙවන් පරිසරයක් යටතේ සිදුවූ දුෂිත ක්‍රියා අපමණය. සිල්රෙදි වංචාව ඉන් එකක් පමණය. වංචා දුෂණ දහස් ගණනක් අතරින් ඉතාමත් සුළු ප්‍රමාණයක් දැනට නීතිය ඉදිරියට පැමිණ තිබේ. විභාග වූ පළමු විමර්ශනය තුලින් රටේ රාජ්‍ය සේවයේ ඉහලම නිලදරුවා සිරබත් කමින් සිටියි.

හිටපු දේශපාලන නායකයන්, ඔවුන්ගේ ඥාතීන්, ඔවුන්ගේ දේශපාලන හිතවතුන්, ඔවුන්ගේ අණ ක්‍රියාත්මක කරනා ලද මිලිටරි කණ්ඩායම් අධිකරණය වෙත ගෙන එන අවස්ථාවේ අධිකරණ භුමි වටකරනා මහා සංඝරත්නය ප්‍රමුඛ දේශපාලන සට්ටැඹියන් මේ නඩුවේදී අතුරුදහන්ව ගොසිණි. සිය තනතුර රැකගැනීමේ චේතනාව අරමුනු කොට තමන්ට කිසිදු ප්‍රතිලාභයක් නොමැතිව මහා මුදල් ප්‍රමාණයක් චන්ද ව්‍යාපාරය වෙත පොම්ප කරනා ලද නිලධාරීන් සිරගෙට යනවිට එම මුදලේ ප්‍රතිලාභ ලද දේශපාලන නායකයන් කිසිවෙකුත් අධිකරණ භුමියේ නැත. අඩු තරමින් ඔවුන්ගෙන් ප්‍රකාශයක් වත් නැත.

රාජ්‍ය සේවකයා වෙත තනතුරු නමැති ටොපි ලබාදී අනෙක ප්‍රතිලාභ ලබාගන්න දේශපාලනඥයින් අවසානයේ සිය රාජ්‍ය සේවක සට්ටම්බියන් තනිකර දමනා ආකාරය පිළිබඳව මෙයට වඩා උදාහරණ නැත. 

එම අර්ථයෙන් ගන්නා කල, ලලිත් වීරතුංග යනු රාජ්‍ය සේවකයාට හොඳ රතු එළියකි. නමුත් අවාසනාවට කාරණය වන්නේ රාජ්‍ය සේවයේ බහුතරයක් වන නිසි සුදුසුකම් හෝ දක්ෂතා සපුරා නොමැති පිරිස් සඳහා උසස්වීම් සහ ප්‍රතිලාභ ලැබීමට සරණ යන එකම මාර්ගය, අවභාවිතය සහ දුෂණය තුලින්  දේශපාලකයක් පිනවීම පමණක්ම වීමය. 

Saturday, September 2, 2017

මොබයිල් දුරකථන වංචාවට ඔබත් හසුවෙලාද?

අසරණ මිනිසුන් මුලා කොට මඩිය තර කරගන්නා වංචා කරුවන් කොතෙකුත් සිටිති. ඔවුන් වංචා සඳහා අනුගමනය කරනා ක්‍රමවේද විවිධාකාරය. බොහෝ වංචා කරුවන් ඉතාමත් සුළු කාලෙකින් හෙළිවී සමාජයේ කළු චරිත බවට පත් වෙති. ඒ අතරම වංචා කරුවනට ඍජුව හෝ වක්‍රාකාරව සහය දී තමන්ටද කොටසක් කඩා ගන්නා තවත් පිරිසක් වෙති. මොවුන් සමාජය ඉදිරියේ සුදු පිරුවට පෙරවාගෙන සිටිනා සමාජයේ සම්මත වැදගත් පිරිසකි. කට්ටඩින්, හූනියම් කරුවන්, වශී කරුවන්, සාස්තර කරුවන්, ස්ත්‍රී රෝග සහ ලිංගික දුබලතා වලට නොවරදින ප්‍රතිකාර ලබාදෙන හොර වෙදුන් වෙනුවෙන් මුදලට දැන්වීම් සහ ලිපි පළකර සිය ආත්මය පාවාදෙන මාධ්‍යවේදීන් සහ පුවත් පත් හිමිකරුවන් සුදු චරිත වංචා කරුවන් අතරින් ප්‍රධානය. 

තාක්ෂණ දියුණුව සමගම වංචා කරුවන් සමග අත්වැල් බැඳගෙන සිටිනා නවතම පිරිස මොබයිල් දුරකථන සමාගම්ය. 

මෙම ලිපියේ ඉහලින් ඇත්තේ එවන් වංචාවක් සඳහා මිනිසුන් ඇදගනීමට ජාතික පුවත් පතක පළකරනා ලද දැන්වීමකි. එහි ඇත්තේ නිවසේ සිට අමතර ආදායමක් ඉපයීමට ක්‍රමය කියාදීම සඳහා අනුගමනය කලයුතු ක්‍රමවේදය යි. එම දැන්වීමට අනුව ක්‍රමවේදය දැනගැනීමට ඉලක්කම් පහකින් යුතු අංකයකට කෙටි පණිවිඩයක් යවා ලියාපදිංචි විය යුතුය. ලියාපදිංචි වන ආයතනයේ නමක්, ලිපිනයක් හෝ දුරකථන අංකයක් දක්වා නැත. දුරකථන සමාගම් දෙකක පාරිභෝගිකයනට පමණක් මෙම සේවාව ලබා දෙන බවද එම දැන්වීමේ සඳහන් වෙයි අවසානයේ අදාළ ගාස්තුවද සඳහන් කොට ඇත. නමුත් දැන්වීමේ පහළින්ම ඇති එම කොටස කියවීමට පියවි ඇසින් නුපුළුවන. 

මේ දැන්වීම දකිනා කවුරුන් හෝ අදාළ අංකයට කෙටි පණිවිඩය යවා ලියාපදිංචි වුයේ නම් මසකට රුපියල් 30 ක මුදලක් සහ එයට අදාළ බදු මුදල දුරකථන අංකයේ බිලට එකතු වෙයි. ලියා පදිංචි වන විට එය අවලංගු කිරීමට භාවිතා කලයුතු කෙටි පණිවිඩ අංකය ලබා දෙන බවද කිව යුතුය. එම අංකය නැතිවුයේ නම් ලියා පදිංචිය අවලංගු කිරීම සඳහා දුරකථන සමාගමේ වෙබ් අඩවියට ලොග් වීම හෝ පාර්භෝගික සේවා මධ්‍යස්ථානය ඇමතිය යුතුය. නැතහොත් දුරකථන සමාගමේ කාර්යාලයකට යා යුතුය. 

දුරකථන සමාගමේ වෙබ් අඩවියට ගොස් ලියාපදිංචිය අවලංගු කිරීම තරමක තාක්ෂණික ක්‍රියාවලියකි.  දුරකථන සමාගමේ පාර්භෝගික සේවා අංශයට කථාකර පාර්භෝගික සේවා නිලධාරියකු අල්ලාගැනීම සමහර විට විනාඩි පහක් පමණ ගතවන කාරියකි. සම්බන්ධ වුවද බොහෝ විට සිදු වන්නේ දුරකථනය විසන්ධි වීමය. 

ලියාපදිංචි වූ අයකුට වරින් වර අදාළ සේවාව පිලිබඳ කෙටි පණිවිඩ ලැබෙයි. ඉන් සමහරක තොරතුරු දන ගැනීම සඳහා පිවිසිය යුතු වෙබ් අඩවියට පිවිසීමට කේතය ලැබෙයි. කෙටි පණිවිඩ කිහිපයක් ලැබීමෙන් පසුව කිසිදු විස්තරයක් ලැබෙන්නේ නැත. නමුත් අදාළ ලියාපදිංචිය අවලංගු කරනා තෙක්ම මසකට රුපියල් 30ක් සහ බදු මුදල අදාළ දුරකථන අංකයෙන් අය වෙයි. මෙලෙස අයකරගන්නා මුදල අදාළ වංචා කරුවා සහ දුරකථන සමාගම අතර කුමන ප්‍රතිශතයකින් බෙදී යන්නේද අප නොදනිමු. නමුත් මුදල අය වන්නේ දුරකථන සමාගම හරහාය. 

වංචා කරුවන් විසින් මෙවන් පුවත් පත් දැන්වීම් පලකිරීමට අමතරව දුරකථන සමාගම් වලට මුදල් ගෙවා අලෙවි ප්‍රවර්ධන ඇමතුම් මුවාවෙන් මෙවන් වංචාකාරී සේවාවන් සඳහා අදාළ සමාගමේ පාරිභෝගිකයන් ලියාපදිංචි කරවයි. සමහර දුරකථන සමාගම් වල ප්‍රවර්ධන ඇමතුම් වලට එක අංකයක් එබීමෙන් පමණක් ලියාපදිංචි විය හැක. මෑතකදී මා හටද ඉන්දික කොඩිතුවක්කු ගෙන් දිනපතා පලාපල දැනගැනීම සඳහා මෙවන් වංචාකාරී සේවාවකට ලියාපදිංචි වන ලෙස පාර්භෝගික සේවා ඇමතුමක් ලැබිණ. 

මේ ලිපිය කියවන ඔබද නොදැනුවත්වම එවන් වංචා වලට හසුවී වසර ගණනාවක් තිස්සේ වංචා කරුවන් සහ දුරකථන සමාගම් පොහොසත් කරමින් ඉන්නවා වන්නට පුළුවන. එබැවින් වහාම ඔබගේ දුරකථන සමාගමේ පාරිභෝගික සේවා අංශය අමතා එවන් වංචනික සේවා වලට ලියාපදිංචි වී ඇතිදැයි සොයා බලා ලියාපදිංචිවූ වංචනික සේවාවන් ඇති නම් ඒවා අවලංගු කරදමා ඔබගේ වටිනා මුදල් ආරක්ෂා කර ගන්න.

Tuesday, August 29, 2017

මාළු කපන්නට රුපියල් එක්ලක්ෂ අනූ හත් දාහක්?

මේ ඡායාරුපයේ  දැක්වෙනුයේ ජාතික පුවත්පතක පළකරනා ලද  දැන්වීමකි. මෙම දැන්වීමට අනුව මත්ස්‍ය නිෂ්පාදන කර්මාන්තයේ ඇසුරුම් කටයුතු සඳහා වන රැකියාවක වැටුප රුපියල් එක්ලක්ෂ අනුහත් දහසකි (රු.1,97,000). අධ්‍යාපන සුදුසුකම අට වසර සමත් වීම පමණි. මෙය නැවක රැකියාවක් බව CDC සහතිකය එනම් නාවිකයන් සඳහා වන අඛණ්ඩ මුදාහැරීමේ සහතිකය ඇති හෝ නැති අයට අයදුම් කළහැකි බව පවසා ව්‍යංගයෙන් පවසා ඇත. නිසි අධ්‍යාපනයක් නොමැති ජවයෙන් යුතු තරුණ පිරිස් වෙත මේ ගෙවන්නේයැයි පවසන වැටුප අතිශය ආකර්ශණීය එකකි.

මේ දැන්වීම දෙස හොඳින් බලන විට දැන්වීම් කරුවාගේ ලිපිනයක් නොමැති බව පෙනී යයි. පුවත්පත භාරයේ ලිපි යොමු කිරීමට අංකයක් හෝ තැපැල් පෙට්ටි අංකයක් නොමැත. ස්ථාවර දුරකථන අංකයක් හෝ ෆැක්ස් අංකයක් ද නැත. ඇත්තේ  මොබයිල් දුරකථන අංකයක් පමණි. 

මෙම රැකියා ඇබෑර්තුව සම්බන්ධව සැක පහල වුවද එය ව්‍යාජ දැන්වීමක් හෝ වංචනික දැන්වීමක් යයි කීමට තවමත් සාක්ෂි නොමැත. 

නමුත් මේ හා සමාන වෙනත් දැන්වීමක් සම්බන්ධව බ්ලොග් කරුගේ අත්දැකීමක් හෙළි කිරීම මෙම දැන්වීම වංචාවක් වන්නේ නම් පරිස්සම් වීම සඳහා ලියා තබමි.

මීට වසර තුනකට පමණ පෙර මේ හා සමාන දැන්වීමක් මෙම දැන්වීම පළකර ඇතියි කියවෙන පුවත් පතෙහිම පළකර තිබිණ. අදාළ පුවත්පත ඕනෑම කුණුගොඩක් පිලිබඳ දැන්වීම් පලකිරීම සඳහා භාර ගන්නා ජාතික යයි කියා ගන්නා එකකි. එය සාත්ස්තර කරුවන්, කට්ටඩින්, හදි හූනියම් කරුවන්, වශී ගුරුකම් කරුවන් වැනි රැවටිලි කරුවන් ගේ පාරාදීසයකි. රැවටිලි කරුවන්ගේ දැන්වීම් පලකිරීම එහි ප්‍රධාන ආදායම් මාර්ගයක් වන බවට විවේචන පවතියි.

එම පුවත් පතෙහි මීට පෙර පල කරනා ලද දැන්වීමක ඇලස්කාවේ මාළු ඇසුරුම් කර්මාන්ත ශාලාවක මාළු කැපීම සඳහා වන ඇබෑර්තු රැසක් ඇති බව පල කර තිබිණ. වැටුප රුපියල් 1,75,000/-කි. මේ දැන්වීම දුටු  මාගේ  බිරිඳගේ මිතුරියක් එය සම්බන්ධව උනන්දු වී තිබුනේ ඇයගේ සැමියාට වැඩි වැටුපක් සහිත විදේශ රැකියාවක් සොයමින් සිටි අවධියකදීය. ඇය මේ දැන්වීම මගේ බිරිඳට පෙන්වූ වහාම මා හට දුරකථන ඇමතුමක් දුන් මගේ බිරිඳ මේ ගැන සොයා බලනා ලෙස දන්වා සිටියාය. මගේ පළමු ප්‍රශ්නය වුයේ ඒජන්සි කරුවා ගේ ගාස්තුව කොපමණද යන්නය.ඒ වන විටත් මිතුරියන් දෙදෙනා අදාළ අංකයට කථා කර අවසන් බව දැන ගැනීමට හැකි වුයේ කිසිදු ගාස්තුවක් ය නොකරනා බව කීවේ යයි මගේ බිරිඳ පැවසීම නිසාය. එවිට මා කීවේ මෙතරම් විශාල වැටුපකට විදේශ රැකියාවක් ලබා දෙන්නේ නම් ඒජන්සි කරුවාගේ ගාස්තුව අවම වශයෙන් රුපියල් ලක්ෂ 20 කට වඩා වැඩි වනු ඇති බවය. "කවුරු හරි උදව්වක් ඉල්ලුවාම ඒක කරලා දෙන්නේ නැතිව පණ්ඩිත කම් කතා කරනවා" යනුවෙන් දුර කථනයේ අනෙක් පසින් තැටියක් වාදනය විය. 

මිතුරිය සහ අගේ සැමියා අදාළ රැකියාව සම්බන්ධව මරදානේ උත්සව  ශාලාවක, ඒජන්සිකරුවා විසින් පවත්වන ලද සම්මන්ත්‍රණයකට සහභාගී වූ බව දින දෙකකට පසුව දැන ගැනීමට ලැබිණ. සම්මන්ත්‍රණයට 800ක පිරිසක් සහභාගී වී තිබිණ. එහිදී කියා තිබුනේ ඊළඟ සතියේ විදේශ ගත වීමට සුදානම් වන ලෙසත්, වීසා සඳහා අවශ්‍ය වෛද්‍ය පරීක්ෂණ වාර්ථාව මරදානේ වෛද්‍ය මධ්‍යස්ථානයකින් ලබා ගන්නා ලෙසත්ය. වෛද්‍ය පරීක්ෂණ ගාස්තුව රුපියල් දහතුන් දහසකි. මෙය වංචාවක් බව මා කෙතෙක් කීවද රුපියල් එක්ලක්ෂ හැත්තෑ පන් දහසක වැටුප සැමගේ ඇස් ගිනිකණ වට්ටවා තිබිණ. 

රුපියල් දහතුන් දහස ගෙවා වෛද්‍ය පරීක්ෂණ වාර්ථාව ලබා ගැනිණ. එදින සිට දින දෙකක් ගතවෙන තෙක් දුර කථනය නාද වුවද පිළිතුරු නොවිණ. දින දෙක අවසානයේ දුරකථන ඇමතුමට පිළිතුරු ලැබිණ. ඒ ඒජන්සි කරුවාගෙන් නොව දුරකථන සමාගමෙනි. "මෙම දුරකථනය භාවිතයේ නොමැත" යන්න ලැබුණ පිළිතුරය.

අනතුරුව වසරකට පමණ පසුව නෙත් එෆ් එම් බැලුම්ගල කණ්ඩායම සහ පොලීසිය එක්ව ඒජන්සිකරුවාව අත්අඩංගුවට ගත් බව වාර්ථා විය. නමුත් නඩු පැවරූ බව දැනගන්නට නැත. ලබා ගන්නා ලද මුදලට වෛද්‍ය පරීක්ෂණ වාර්ථාව ලබා දී ඇති නිසා සමහර විට නඩු නිමිත්තක් නැතිද යන්න නොදනිමු. කෙසේ හෝ ඒජන්සි කරුවා රුපියල් ලක්ෂ පනහක පමණ මුදලක් අහිංසකයින් රවටා වංචා කර ඇති බව බැලුම් ගලෙහි කියවින.

Sunday, August 27, 2017

ජපානයේ නින්ජාවරු

නින්ජා යන නම ඇසුණු සැනින්ම අප හට මතක් වන්නේ සටන් කරුවන් පිරිසකි. නමුත් ඇත්තෙන්ම නින්ජාවරු යනු ඔත්තු කරුවන් ය. නින්ජා සටන් කලාව ලෙසින් අප හඳුන්වන්නේ මෙම ඔත්තු කරුවන්ගේ ආරක්ෂාව සඳහා ප්‍රගුණ කරනු ලබනා සටන් විධික්‍රමයයි. නින්ජා සටන් ක්‍රම කලාත්මක බවකින් යුක්තය. නමුත් මාරාන්තිකය. 

නින්ජා ඔත්තුකරුවන් පාරම්පරිකවම එම වෘතියේ යෙදුනාවූ පිරිසකි. නින්ජා වරයකු වීම සඳහා පුහුණුව ළදරු වියේදීම පටන් ගනු ලබයි. නින්ජා වරුන් පවසනුයේ තම වෘතිය වේගය මත රඳා පවතින්නක් බවය. තමන් ලබා ගන්නා තොරතුරු හැකි තරම් වේගයෙන් අදාළ ස්ථාන වලට ලබා දීම ඔවුන්ගේ වගකීමය. මේ නිසා නින්ජා පුහුණුවේ පළමු අදියර වේගයෙන් ඇවිදීමේ පුහුණුව ලබා ගැනීමය. සෙනග ගැවසෙන ස්ථානයක දිව යන මිනිසකු නිතරම අනුන්ගේ අවධානයට යොමුවන නිසා ඔවුහු දිව යන තරම් වේගයෙන් ඇවිදගෙන යාමට පුහුණු වෙති.  කිරිගොට්ටක් වැනි බට පතුරු වලින් සකසන ලද හිස් වැසුමක් උදරයේ රඳවාගෙන, එය නොවැටෙන ලෙසින් ඇවිද යාම වේගවත්ව ඇවිද යාම සඳහා සිදුකරනා පුහුණුව වෙයි.

නින්ජා ඔත්තු කරුවන් අති දක්ෂ සටන් කාමීහු වෙති. ඔවුන්ගේ සටන් ආයුධ අතර කඩු ප්‍රධාන තැනක් ගන්නා නමුදු කිසිවකුට නොපෙනෙන ලෙස සඟවා යා හැකි කුඩා ආයුධ රැසක් ඔවුන් භාවිතා කරති. කෙතරම් ආයුධ තිබුනද, ඒ සියල්ලට වඩා වටිනාම අවිය මුදල් බව නින්ජා වරු පවසති. එබැවින් නිතරම  විශාල මුදල් ප්‍රමාණයක් සඟවා තබා ගැනීම සඳහා රහස් ගබඩා නින්ජා නිවෙස් වල ඇත. සමහර රහස් ගබඩා වලට පිවිසීමට නිවසේ ජනේලයක් විවෘත කර ජනේලයේ උලුවස්සෙන් කොටසක් ඉවත් කල පසුව පොලව ආවරණය කරනා ලීයක් ගැලවීම මගින් සිදු කල හැක. එම දොරටුව කිසිවකුටත් තේරුම් ගත නොහැක. එමෙන්ම සතුරන් වටකරනා ලද අවස්තාවක නිවසින් පිටව යාම සඳහා රහස් දොරටු රැසක් මේ නිවාස වල පවතියි.

නින්ජා වරු භාවිතා කරනා ආයුධ අතරින් බොහොමයක් තියුණු ලෙස  සුවිශේෂී වානේ වලින් සාදා විෂ පෙවූ මාරාන්තික ඒවා වන අතර එම ආයුධ කිසිවකු ඇස නොගැටෙන ලෙසින් සඟවා ගෙන යා හැකි ආකාරයට ආවරණ සහිතය. උදාහරණයක් ලෙසින් කිවහොත් සංගීත නාදය ඉපදවන ලෙස වාදනය කල හැකි බටනලාවල තියුණු සිහින් පිහි සඟවා ඇත. මේ බටනලා නින්ජා කාන්තාවන් නිතර භාවිතා කර ඇති ආයුධ අතරින් එකකි. බටනලාව වාදනය කරනා අතර සිය වසඟයට ගන්නා සතුරන් බටනලාව තුලින් ඉවතට ගන්නා පිහියෙන් ඝාතනය කර නැවත පිහිය බටනලාව තුල රුවාගෙන නලාව වාදනය කිරීමට ඔවුනට හැක.

සිය ඇඟිලි අතර රුවාගෙන විසිකිරීම මගින් පහරදිය හැකි තාරකා නම් වන ආයුධයෙහි නිපුන තාව  දක්ෂ නින්ජා වරයකු අනිවාර්යයෙන්ම ප්‍රගුණ කළයුත්තකි. 

මේ වනවිට නින්ජා වරුන්ගේ ඔත්තුකාර සේවය සඳහා අවශ්‍යතාවයක් නොමැත. නමුදු පාරම්පරික නින්ජා පවුල් කිහිපයක් සිය ශිල්පී ක්‍රම නැසී යාමට නොදී පවතවාගෙන යති. මේ වනවිට ඔවුන්ගේ ප්‍රධාන ආදායම් මාර්ගය සංචාරකයන් සඳහා නින්ජා සටන් ක්‍රම සංදර්ශන පැවැත්වීමය. සංචාරකයන් සඳහා පවත්වන මේ සංදර්ශන තුලින් ජපානය වෙත විශාල විදෙස් විනිමයක් නින්ජා වරුන් ගෙන එති. 

Wednesday, August 23, 2017

වෙනස සැපද?

යහපාලන රජය පිහිටුවීමට දර දිය අදිනු ලැබූ පිරිස බොහෝය. මේ අතරින් බහුතරයක් කිසිදු ප්‍රතිලාභයක් බලාපොරොත්තු නොවී, පැවති දුර්දාන්ත පාලන ක්‍රමය පෙරලා දැමීමේ අදහසින්ම පමණක් කටයුතු කරනා ලද පිරිසකි. මෙයට පෙරදී ආණ්ඩු පෙරළි සඳහා පෙරමුණ ගනු ලැබුයේ සමාජ ක්‍රියාකාරීකයන් සහ මාධ්‍යවේදීන්ය. නමුත් යහපාලන රජය පිහිටුවීමේ පෙරමුණ ගෙන සිටියේ සමාජ මාධ්‍ය ජාලා ක්‍රියාකාරීන්ය. එය තාක්ෂණයේ දියුණුවත් සමගම බිහිවූ නව ප්‍රවනතාවකි.  ප්‍රධාන මාධ්‍ය ආයතන සියල්ල රාජපක්ෂ ගැතිව සිටි අවදියක විපක්ෂ දේශපාලනය සඳහා ඉතිරිව තිබුනේ ෆේස් බුක් ප්‍රධාන සමාජ මාධ්‍ය පමණකි.

නව රජය බිහිවීමත් සමගම රජයේ ප්‍රධාන තනතුරු සමහරක් සඳහා යහපාලන ප්‍රතිපත්ති වෙත කිසි ලෙසකවත් නොහොබිනා චරිත කිහිපයක් තෝරා ගැනිණ. වෙනස වෙනුවෙන් කැපවූ පිරිස් "දැන් වෙනස සැපද?" ලෙසින් ගර්භාවට ලක් වන මට්ටමට සමහර තීරණාත්මක  තනතුරු වෙත පත් කරනා ලද පුද්ගලයන්ගේ පෙර ක්‍රියාකලාපය නොහොබිනා මට්ටමක පැවතිණ. නමුත් සමාජ ජාල හෙළිකිරීම් මැද එවන් බොහෝ පුද්ගලයින්ගේ තනතුරු ගලවා දැමීමට රජයට සිදුවිය. 

කවුරුන් කෙසේ විවේචනය කලද මේ වනවිට යහපාලන රජය පිහිටුවීම නිසා රටෙහි සුවිසල් සාමාජීය සහ දේශපාලනමය ප්‍රගමනයක් සිදුව ඇත. පෙර දුර්දාන්ත සමයේදී රජය විවේචනය කරනා ලද පුද්ගලයනට සුදු වෑන් සාත්තුව ලැබුනද නව රජය තුල එවන් ප්‍රජාතාන්ත්‍ර විරෝධී ක්‍රියා පසුගිය වසර දෙක පුරාවට වාර්තා වුයේ නැත. මේ වෙනස රාජපක්ෂ කුක්කනට බොරදියේ මාළු බෑමට කදිම අවස්ථාවක් උදා වී ඇත. අවම වශයෙන් සෑම සතියකට වරක් ප්‍රධාන මාර්ග හරස් කරමින් පවත්වන විරෝධතා සාමාන්‍යකරණය වී ඇති බව දක්නට ලැබෙයි. රාජපක්ෂ රෙජීමයේ අනුග්‍රහයෙන් සහ මුල්‍ය ආධාරයෙන් ආරම්භ කරනා ලද සයිටමයට විරුද්ධව අද ජනතාව පෙළමින් විරෝධතා දක්වනුයේ රාජපක්ෂ කුක්කන් වීම පුදුමයට හේතුවක් නොවන්නේය.

පසුගිය සති කිහිපය තුල ජනමතයට හිස නවමින් චෝදනා වලට ලක්වූ රජයේ ප්‍රධාන අමාත්‍ය වරුන් දෙදෙනකු ඉවත් කිරීමට රජය ගන්නා ලද තීරණය රටෙහි ඉදිරි ගමන කෙරෙහි බලාපොරොත්තු තබා ගත හැකි තත්වයක් උදාකර ඇත. එය තවත් අතකින් අනෙකුත් දේශපාලන නායකයනටද රතු එලි දල්වීමකි. එනම් චෝදනා වලට ලක් වුවහොත් කුමන තරාතිරමක සිටියද බේරා ගැනීමට කිසිවකු නොමැති බව මතක් කර දීමකි. 

දිනෙන් දින සිය වපසරිය පුළුල් කරගන්නා සමාජ ජාලා ක්‍රියා කාරීත්වය හේතුවෙන්, චෝදනා වලට ලක් වන නායකයන්ට එරෙහිව රජය කෙරෙහි ඇතිවන පීඩනය මහා මාර්ගය හරස් කරමින් ජනතාව පීඩාවට පත් කරනා විරෝධතාවනට වඩා සිය දහස් ගුණයකින් විශාලය. කොරේ පිට මරේ කීවාක් මෙන් තොරතුරු දැනගැනීමේ අයිතිය පිලිබඳ පනත ක්‍රියාකාරී වීම, සන්නිවේදන තාක්ෂණයේ දියුණුව කරනකොට ගෙන  දත්ත විශ්ලේෂණය සඳහා තිබෙන අවස්ථා නිසා දුෂණ හෙලිකරගැනීමට ඇති හැකියාව මෙන්ම  රජය විසින් මර්ධනයෙන් තොරව පවත්වාගෙන  යන ප්‍රජාතාන්ත්‍රීය පාලන ක්‍රමවේදය නිසා විවේචනය සඳහා පොදු ජනතාව බිය නොවීම සියලු අයථා ක්‍රියා වලකා ලීමට හේතුවක් වනු ඇත.

අවසානයේ කිව යුත්තේ වෙනස සැප බවය.

Monday, July 17, 2017

දූෂණ මර්දනය හා ස්මෝල්ගේ ආදර්ශය – වික්ටර් අයිවන්

විවිධ බලපෑම් සහ රාජ්‍ය බලය යොදවමින් විනාශ කරනා ලද ක්‍රිස්තියානි පාසල් අධ්‍යාපන ක්‍රමය තුල පවතින සමානාත්මතාව පිළිබඳව ඉතාමත් වටිනා ආදර්ශයක් සහිත නිදසුනක් මෙම පැරණි රාවය ලිපිය ගෙනහැර දක්වයි. 

දේවගැති ඩබ්ලිව්.ජේ.ටී. ස්මෝල්  රිච්මන්ඩ් විදුහල පාලනය කරනා ලද ජේම්ස් ඩැරල්ගේ අනුප්‍රාප්තිකයාය. ඩැරල් එතෙක් රිච්මන්ඩ් විද්‍යාලයේ ගමන් මග කෙරෙහි වැඩිම බලපෑමක් ඇති කළ විදුහල්පතිවරයාය. ඔහුගේ හදිසි අභාවයෙන් පසුව ඒ අඩුව පිරවීමට සුදුසු විදුහල්පතිවරයෙකු තමන්ට නොලැබෙනු ඇතැයි කියන අපේක්ෂාභංග හැඟීම්වලින් එම විද්‍යාලයේ ශිෂ්‍යයන් වෙලීසිටින අවස්ථාවකදී ස්මෝල් ඔවුන් අතර වඩා හොඳ අලූත් බලාපොරොත්තු ඇති කළේය. මේ දෙදෙනාම බ්‍රිතාන්‍ය ජාතික මෙතෝදිස්ත පූජකයෝ වූහ. ස්මෝල් කේම්බ්‍රිජ් උපාධිධාරියෙකි. ඔහු දේවගැතිවරයකු වුවද දේවධර්මයට සීමා නොවූ විද්‍යා උපාධිධාරියෙක් විය. ඉංග්‍රීසි භාෂාව හැරුණු විට ලතින්, ග්‍රීක්,  ප්‍රංස හා ජර්මන් යන භාෂාද දැන සිටියේය. ගණිතය ඔහුගේ ප්‍රියතම විෂය විය. ස්මෝල් 1906 සිට 1920 දක්වා එම විද්‍යාලයේ විදුහල්පති ලෙස සේවය කළේය. 1926 සිට 1953 දක්වා වෙනත් විවිධ රටවල මිෂනාරී කටයුතුවල නිරතවී 1956 පෙරළිය ආසන්නයේ නැවත ලංකාවට පැමිණ ඉන්පසු මරණය තෙක්ම ලංකාවේ ජීවත් විය. ස්මෝල් සිය විදුහලේ ශිෂ්‍යයන් අතර ජාතික අභිමානය ඇති කිරීම සඳහා ජාතික සංගමය නමින් සංවිධානයක් ඇති කළේය. 56 ආගමික හා භාෂාමය විප්ලවය කෙරෙහි බලපෑ ප්‍රධාන චරිත දෙකක් (පී.ද එස්. කුලරත්න හා එල්.එච්. මෙත්තානන්ද) ස්මෝල් විදුහලේ පවත්වාගෙන ගිය ජාතික අභිමාන ව්‍යාපෘතියේ උද්යෝගිමත් අනුගාමිකයෝ වූහ. ලංකාවට පැමිණ බණ්ඩාරනායකගේ 56 විප්ලවය නරඹමින් සිටි අවස්ථාවේදී ඒ විප්ලවයේ ප්‍රමුඛ චරිත දෙකක් තමා පාසලට හඳුන්වා දෙන ලද ජාතික අභිමාන ව්‍යාපෘතිය නැමති ගර්භාෂයේ හැදුණු අය බව පෙනුණු විට ස්මෝල් තුළ ඇතිවන්නට ඇත්තේ කෙබඳු හැඟීමක්ද යන්න පැහැදිලි නැත. කුමන ආගමකට හෝ කුමන ජාතියකට අයත් වුවද ස්මෝල් ගුරුවරයකු සඳහා පමණක් නොව පැවිදිවරයකු සඳහාද දැක්විය හැකි හොඳ ආදර්ශ ප්‍රතිරූපයක් ලෙස සැලකිය හැකිය. ඔහු අධ්‍යාපනය සඳහා පූර්ණ කැපවීමක් පෙන්නුම් කළ හා ඉතාමත් සරල, චාම් ජීවිතයක් පවත්වාගෙන ගිය පුද්ගලයෙක් විය.

නායකයන් හොඳට හෝ නරකට ලබාදෙන ආදර්ශයන් අනුගාමිකයන් කෙරෙහිද බලපායි. මහා ගණයෙහිලා සැලකිය හැකි ශ්‍රේෂ්ඨ නායකයන් ලබාදෙන ආදර්ශ සමහර විට සමාජය කෙරෙහි අවුරුදු දහස් ගණනක් බලපායි. ඉවසිය නොහැකි තරමට ගඳගහන රටක තත්ත්වයට පත්ව තිබෙන ශ්‍රී ලංකාවට ස්මෝල් ලබාදී තිබෙන මහා ආදර්ශයක් මෙසේය.

ආර්.ඒ. ඩි මෙල් හ ඩී. එම්. රාජපක්ෂ
ස්මෝල් දේවගැතිවරයකු වුවද ක්‍රීඩාවට මහත් සේ ඇලූම් කළේය. ඔහු විද්‍යාලයේ ක්‍රිකට් ක්‍රීඩාවේ වර්ධනය සඳහා අනුපමේය සේවයක් කළේය. එකල රිච්මන්ඞ් විද්‍යාලයේ ක්‍රිකට් නායකයා තෝරාගනු ලැබුවේ පාසල් ශිෂ්‍යයන්ගේ ඡන්දයෙනි. සාකච්ඡාවට ලක් කරන්නට යන මෙම අපූරු සිද්ධිය සිදුවී තිබෙන්නේ 1916දීය. පාසල් ක්‍රිකට් කණ්ඩායමේ නායකත්වයට සිටි සුදුසුම පුද්ගලයා වී ඇත්තේ පෙර වසරේත් විදුහලේ ක්‍රිකට් කණ්ඩායම් නායකයා ලෙස ක්‍රියා කළ ඩී. එම්. රාජපක්ෂය. ඩී.එම්. රාජපක්ෂ 1936 සිට 1948දී මියයන තෙක්ම හම්බන්තොටින් රාජ්‍ය මන්ත්‍රණ සභාව නියෝජනය කළ රුහුණේ සිංහයා නමින් හැඳින්වුණු ජනාධිපති මහින්ද රාජපක්ෂගේ ලොකු තාත්තා (පියාගේ සහෝදරයා) ය. ඔහුගේ තරඟකරු වූයේ ලංකාවේ ප්‍රමුඛ ධනවත්ම පවුලකින් පැවත එන ආර්.ඒ. ඩි මෙල්ය. ඔහු 1940 සිට නිල වාර දෙකක් කොළඹ නගරාධිපති වශයෙන් ක්‍රියා කළ අතර 1947 පාර්ලිමේන්තු මැතිවරණයෙන් දකුණු කොළඹ ආසනයට එක්සත් ජාතික පක්ෂයෙන් තේරී පත්වූ මන්ත්‍රිවරයාය. 1948දී ඡන්ද පෙත්සම් නඩුවක් නිසා ඔහුට මන්ත්‍රීකම අහිමි විය.

ආර්.ඒ. ඩි මෙල්ද දක්ෂ ක්‍රිකට් ක්‍රීඩකයකු වුවත් ඩී.එම්. රාජපක්ෂට සම මට්ටමේ තැබිය හැකි ක්‍රීඩකයෙක් නොවීය. ඉතා ධනවත් පවුලකින් පැවත එන්නකු වීම හේතු කොටගෙන ඔහු ක්‍රිකට් නායකයා තෝරන තරගයට ඉදිරිපත් වන අවස්ථාව වනවිට විශාල වශයෙන් ශිෂ්‍යයන්ට කෑමබීමෙන් සංග්‍රහ කිරීමෙන් විදුහලේ ශිෂ්‍යයන් අතර ජනප්‍රිය පුද්ගලයකු බවට පත්ව සිටියේය. අවසානයේ ක්‍රිකට් නායකයා තෝරන තරගයෙන් ඒ තනතුර සඳහා සුදුසුම පුද්ගලයාව සිටි ඩී.එම්. රාජපක්ෂ පරාජය කොට ක්‍රිකට් කණ්ඩායමේ නායකයා ලෙස තේරී පත්වීමට ඔහු සමත් වී තිබේ.

මෙල්ගේ ජයග්‍රහණය හා රාජපක්ෂගේ පරාජය විදුහල්පති ස්මෝල් ශිෂ්‍යයන්ට දැනුම් දෙන ලද්දේ ඒ උද්වේගකර අවස්ථාවට සහභාගි වූ සියලූදෙනා විස්මයට පත්කරන දැනුම්දීම් ගණනාවක්ද ඇතුළත් වන ආකාරයටය. ඩී.එම්. රාජපක්ෂ පරාජය වී ශිෂ්‍ය ඡන්දයෙන් ආර්.ඒ. ඩි මෙල් තේරී පත්ව සිටින බව පළමුවෙන් ඔවුන්ට දැනුම් දුන්නේය. හෙට සිට ඩී. එම්. රාජපක්ෂ රිච්මන්ඞ් විද්‍යාලයේ අධ්‍යාපනය නොලබනු ඇති බවත් ඒ වෙනුවට කොළඹ වෙස්ලි විද්‍යාලයට එකතු වනු ඇති බවත් ප්‍රකාශ කරමින් එම වසරේ රිච්මන්ඩ් ක්‍රිකට් කණ්ඩායම කිසිම ක්‍රිකට් තරගයකට සහභාගි නොවනු ඇති බවත් ප්‍රකාශ කළේය. විදුහල්පති ස්මෝල්, රාජපක්ෂගේ පරාජය කෙරෙහිත් ආර්.ඒ. ඩි මෙල්ගේ ජයග්‍රහණය කෙරෙහිත් දූෂණය බලපෑ ආකාරය සියැසින් දැක්කේය. මෙල් ජයගත්තේ ඒ තනතුරට සුදුසුම පුද්ගලයා වීම නිසා නොව එම ජයග්‍රහණය ලබාගැනීම සඳහා අත දිගහැර වියදම් කිරීමට ඔහුට පුළුවන්කම තිබුණු නිසාය. මෙල්ගේ ආගම ක්‍රිස්තියානි වුවත් රාජපක්ෂ බෞද්ධයෙක් විය. ස්මෝල් ක්‍රිස්තියානි දේවගැතිවරයකු වුවද ක්‍රිස්තියානි ශිෂ්‍යයකු බෞද්ධ ශිෂ්‍යයකු යටපත් කරමින් ලැබූ අයථා ජයග්‍රහණය ඉවසන්නට ඔහු සූදානම් නොවීය. තමන්ගේ විද්‍යාලයේ ශිෂ්‍යයන් යුක්තියට පක්ෂපාත නොවී මෙල්ගේ නිර්ලෝභී සංග්‍රහයන්ට නතුවී අයුක්තිය ජයග්‍රහණය කරවීමට දායකවීම ඔහුගේ බලවත් විරෝධයට හේතුවී තිබුණි. ඒ වසරේ සිදුකරන්නට නියමිතව තිබුණු සියලූ ක්‍රිකට් තරග අවලංගු කිරීමකින් දූෂණයෙන් නායකත්වයට තේරී පත්වූ පුද්ගලයාට පමණක් නොව එහිදී දූෂණයට නතුවූ ශිෂ්‍යයන්ටද පාඩමක් ඉගැන්වීය. එකල කොළඹ වෙස්ලි විද්‍යාලය සලකන ලද්දේ ලංකාවේ සියලූ මෙතෝදිස්ත පාසල්වලට තිබුණු මව් පාසල වශයෙනි. ඩී.එම්. රාජපක්ෂ වහාම ක්‍රියාත්මක වන පරිදි වෙස්ලි විද්‍යාලයට අනුයුක්ත කිරීම මගින් ඔහුට සිදුවූ අසාධාරණයට වන්දි ගෙවීමක් සිදුකළා පමණක් නොව ඒ මගින් තමා විදුහල්පති වශයෙන් ක්‍රියාකරන රිච්මන්ඩ් විද්‍යාලයට දඬුවම් කිරීමක්ද සිදු කළේය.

මේ මගින් විදුහල්පති ස්මෝල් රිච්මන්ඞ් විද්‍යාලයට පමණක් නොව රටේ අන් සියලූ විද්‍යාලවලටද ලබාදී තිබෙන ආදර්ශය සැලකිය හැක්කේ ශ්‍රේෂ්ඨ ආදර්ශයක් ලෙසය. රටට අවශ්‍යව ඇත්තේ එවැනි නායකයන්ය. රටේ අවාසනාවකට රටට නැත්තේද එවැනි නායකයන්ය.

උපුටා ගැනීම: "දූෂණ මර්දනය හා ස්මෝල්ගේ ආදර්ශය – වික්ටර් අයිවන්"  ලිපියෙනි 

Sunday, July 16, 2017

කුණු කතාවක් හෙවත් කුණු කථිකාවක්

වර්තමාන ශ්‍රී ලාංකික සමාජය මුහුණ දෙන ප්‍රධාන ගැටළු අතරින් මුලික තැනක් ගන්නේ කුණු බැහැර කිරීමේ ක්‍රමවේදය පිලිබඳ ගැටළුකාරී තත්වයයි. රට පුරාම මෙම ගැටළුව තිබුනද එය වඩාත්ම උග්‍ර වී ඇත්තේ නාගරික සහ අර්ධ නාගරික ප්‍රදේශ වලය. නිවෙස් වලින් බැහැර කරනා ද්‍රව්‍ය "කුණු" නැතහොත් "අපද්‍රව්‍ය" ලෙසින් ජන මනසේ නිදන්ගතව ඇත. ඇත්තෙන්ම කිවහොත් බැහැර ද්‍රව්‍ය කුණු බවට පත් කරනු ලබන්නේ මිනිසුන් විසින්මය.  ඒ සියලුම බැහැර ද්‍රව්‍ය එක මල්ලකට එකතු කිරීමේ හේතුවෙනි. ඉතාමත් සුළුතරයක් නිවෙස් වල සහ බහුතරයක් කාර්යාල වල බැහැර ද්‍රව්‍ය වෙන් වෙන්ව එකතු කලද ඒවා අදාළ ස්ථානයෙන් බැහැර කරනා අවස්ථාවේදී එකම ට්‍රැක්ටරයකට හෝ වාහනයකට පටවනු ලබනා බව නිරීක්ෂණය කළ හැක. මේ හේතුවෙන් සිදු වන්නේ නැවත ප්‍රයෝජනයට ගත හැකි වටිනා කමකින් යුක්ත සම්පතක් "කුණු" ලේබලය යටතේ පරිසර දුෂක කාරකයක් බවට පත් වීමය. නැතහොත් වචනයේ පරිසමාප්තාර්ථයෙන්ම කුණු වීමය.

නිවෙස් වලින් බැහැර කරනා ද්‍රව්‍ය ප්‍රධාන වශයෙන් පහත දැක්වෙන ආකාරයට වර්ගී කරණය කල හැක.
1. ඉතිරි ආහාර, ඉඳුල් සහ ආහාර සැකසීමේදී ඉතිරිවන කොටස් 
2. පිරිසිඳු ප්ලාස්ටික් සහ පොලිතීන් ( උදා:- වතුර බෝතල්, පොලිතීන් සහ ප්ලාස්ටික් ඇසුරුම්)
3. අපිරිසිඳු ප්ලාස්ටික් සහ පොලිතීන් (උදා:- ඉඳුල් සහිත පොලිතීන්)
4. පිරිසිඳු කඩදාසි සහ කාඩ්බෝඩ් 
5. අපිරිසිඳු කඩදාසි සහ කාඩ්බෝඩ් 
6. වීදුරැ 
7. ලෝහ 
8. භාවිතයෙන් පසුව ඉවත් කරනා ඉලෙක්ට්‍රොනික උපකරණ සහ කොටස්
9. රෙදි, රබර් සහ වෙනත් විවිධ බැහැර ද්‍රව්‍යය 
10. ගෙවතු වලින් ඉවත් කරනා ශාක කොටස්.

මෙම ද්‍රව්‍ය අතරින් වේගවත්ව ඉවත් කලයුතු බැහැර ද්‍රව්‍ය ලෙසින් පහතින් දක්වෙන වර්ග තුන පෙන්වා දිය හැක. 
1. ඉතිරි ආහාර, ඉඳුල් සහ ආහාර සැකසීමේදී ඉතිරිවන කොටස් 
2. අපිරිසිඳු ප්ලාස්ටික් සහ පොලිතීන්
3. අපිරිසිඳු කඩදාසි සහ කාඩ්බෝඩ් 

ඉතිරි වර්ග සියල්ලම කාලයක් පුරා එකතු කිරීමෙන් අනතුරුව එකවර (සතියකට හෝ මාසයකට වරක්) බැහැර කිරීමේ හැකියාව පවතියි. එලෙසින් එකතුකිරීමෙන් අවට පරිසරයට කිසිදු බලපෑමක් වන්නේ නැත.

ඉහත ලයිස්තුවේ දක්වා ඇති ද්‍රව්‍ය අතරින් නැවත ප්‍රයෝජනයට ගැනීමේ ක්‍රියාවලිය අපහසු වන්නේ 
1. අපිරිසිඳු ප්ලාස්ටික් සහ පොලිතීන්
2. අපිරිසිඳු කඩදාසි සහ කාඩ්බෝඩ්
3. ගෙවතු වලින් ඉවත් කරනා ශාක කොටස් යන වර්ග තුන පමණි
අනෙකුත් සියලුම බැහැර ද්‍රව්‍යය ඍජුවම නැවත ප්‍රයෝජනයට ගැනීමේ හැකියාවක් පවතියි. 

නමුත් මේ සියළු බැහැර ද්‍රව්‍ය එකට එකතු කල විට ඒවා අතරින් කිසිම ද්‍රව්‍යයක් වියදම්කාරී තේරීමකින් සහ සැකසීමෙකින් තොරව නැවත භාවිතයට ගැනීමේ හැකියාව නොලැබී යයි. එනම් මේ සියල්ල එකතු වී කුණු බවට පත් වෙයි.

මේලෙස පරිසර දුෂණකාරී සහ ගැටලුකාරී කුණු කඳු නිර්මාණය වීමට ප්‍රධාන හේතුව බවට පත්වී තිබෙන්නේ අදාළ බලධාරීන් විසින් ඉවත දමනා ද්‍රව්‍ය එකතු කිරීම එකම ආයතනයක් වෙත ලබාදීමය. එවිට කුණු බැහැර කිරීමේ යෙදී සිටින රාජ්‍ය ආයතන සහ කොන්තරාත් කරුවන් කරනුයේ එක මධ්‍යස්ථානයකට සියල්ල එකතු කර විකිණිය හැකි දේ පමණක් තෝරා විකුණාගෙන ඉතිරිය අඩි  සිය ගණන් උස කුණු කඳු බවට පත් කිරීමය.

ආහාර බැහැර ද්‍රව්‍ය නිසි වෙලාවට එකතු කරන්නේ නම් ඒවා ඌරන් වැනි සත්ව ගොවිපල සඳහා කදිම සත්ව ආහාරයකි. ඒවා එකතු කිරීම සුළු පරිමාන සත්ව ගොවීනට භාර දෙන්නේ නම් ඔවුන් නිවෙස් වලටම ගොස් එකතු කරගන්නවා ඇත. 

ඒ ආකාරයට අනෙකුත් ද්‍රව්‍ය එකතු කිරීමද අදාළ විවිධ පුද්ගලයන් හෝ  ආයතන වෙත පවරන්නේ නම් ඒවාද කුණු කඳු බවට පත් නොවී ඍජුවම ප්‍රතිචක්‍රීකරණ කර්මාන්ත ශාලා වෙත යනු ඇත.  ගෙවතු වලින් ඉවත් කරනා ශාක කොටස් කොම්පෝස්ට් නිෂ්පාදනයට හෝ පහත බිම් ගොඩ කිරීමට යොදා ගත හැකිය. 

මේ ආකාරයේ ක්‍රමවේදයක් ක්‍රියාත්මක වන්නේ නම් බැහැර ද්‍රව්‍ය සැකසීමේ මධ්‍යස්ථාන වෙත යොමු කල යුතු වන්නේ 
1. අපිරිසිඳු ප්ලාස්ටික් සහ පොලිතීන්
2. අපිරිසිඳු කඩදාසි සහ කාඩ්බෝඩ් පමණි. ඉතිරි සියළු බැහැර ද්‍රව්‍ය කිසිදු වියදමකින් හෝ පරිසර දුෂණයකින් තොරව නිවෙස් හෝ කාර්යාල වලින් ඉවත් වනු ඇත.

Thursday, July 13, 2017

ලංකාවේ දුප්පත් කමට හේතුව අමනකමය - අජිත් පැරකුම් ජයසිංහ ගේ ලිපියට ඌණ පූරණයක්

අජිත්  පැරකුම් ජයසිංහ විසින් ලංකාවේ දුප්පත් කමට හේතු සම්බන්ධව සමාජ ජාල සංවාදයකට පසුව ඒවා ලැයිස්තු ගත කර තිබුණි. එම සංවාදයට අනුව ඔහුගේ ලැයිස්තුව පහතින් වෙයි.

1. නූගත්කම (අධ්‍යාපන ක්‍රමය ද බුද්ධිය මොට කරයි. නිර්මානශීලිත්වය වළක්වයි)
2. ජ්‍යෝතිෂය, කට්ටඩි හා හොර වෙද්දු
3. බේබදුකම
4. බැංකු, මුල්‍ය ආයතන හා ගිනිපොළීකාරයෝ
5. රජය අය කරන බදු හා රාජ්‍ය ණය
6. කම්මැලිකම
7. බෝ නොවෙන රෝග
8. මහළු වියේදී, අබල දුබල වූ විට සමාජාරක්ෂණයේ පිහිටක් නැති වීම
9. කාන්තාවන් රැකියා නො කිරීම (ශ්‍රම බලකායෙ ඉන්නෙ කාන්තාවන්ගෙන් 35%යි)
10. රැකියා කුසලතා ගොඩනගා නො ගැනීම
11. සූදුව හා ලොතරැයි
12. පවුල් සැලසුම් නො කිරීම
13. රාජ්‍ය අකාර්යක්ෂමතාව
14. දුප්පත්කම මත පදනම්ව ක්‍රියාත්මක වන රජයේ හා රාජ්‍ය නොවන සංවිධානවල දූෂණ
15. සහනාධාර

ජිත්  පැරකුම් ජයසිංහගේ  මතය කෙසේ වෙතත් මා නම් දකින්නේ ලංකාවේ දුප්පත් කමට එකම හේතුව සමස්ථ ජනතාවගේම අමනකම බවය.  එය උදාහරණයකින් පැහැදිලි කර හැක. පහත චායාරුපයේ දැක්වෙනුයේ මුහුදුබඩ දුම්රිය මාර්ගයේ ගමන් ගන්නා දුම්රියක විදුලි පංකාවකි.


වසර පහකට අඩු කාලයක් පමණක් පැරණි ඉන්දියාවෙන් ගෙන්වන ලද මේ දුම්රිය මැදිරි වල විදුලි පංකා ක්‍රියා විරහිත වීමට ගතවුයේ ඉතාමත් සුළු කාලයකි. ක්‍රියා විරහිත වීමට හේතුව පංකාවේ විදුලි මෝටරය ක්‍රියාත්මක වීම ආරම්භ කිරීමට අවශ්‍ය කැපෑසිටරය දෝෂයට ලක්වීමය. මෙම  කැපෑසිටරයහි තොග මිල රුපියල් අසුවක් පමණ වෙයි. කැපෑසිටරය මාරු කිරීම ඉතාමත් පහසු ක්‍රියාවකි. නමුත් අතිරික්ත සේවකයන් දහස් ගණනක් පිං පඩි ගන්නා දුම්රිය දෙපාර්තමේන්තුවේ කැපෑසිටරය මාරු කිරීමට සේවකයෙක් නොමැත. හිටියත් කරන්නේ නැතිද නැතිනම් නිසි වෙලාවට අමතර කොටස් නොලැබෙන්නේද යන්න වෙනමම විමසා බැලිය යුතු කරුණකි.

කැපෑසිටරය දෝෂයට ලක්වූ විදුලි පංකාවේ ස්විචය දැමු විට පංකාව ක්‍රියාත්මක වන්නේ නැති අතරම එහි මෝටරය අධික රත් වීමකට භාජනය වෙයි. අධික තාපය හේතුකොටගෙන මොටර්යේ දඟරය පිලිස්සී යයි එයින් මුළු පංකාවම නැවත ප්‍රයෝජනයට ගත නොහැකි මට්ටමට විනාශ වෙයි. 

රුපියල් අසුවක් වැයකොට විනාඩි පහක කාලයකදී පිළිසකර කිරීමට හැකි පංකාව විනාශව යන තෙක්ම ඇස්කන්  සිටින තරමට දුම්රිය දෙපාර්තමේන්තු නිලධාරීන් අමනයන්ය. මෙහි වඩාත්ම සිත් ඇදගන්නා සුළු කාරණය වන්නේ දුම්රිය දෙපාර්තමේන්තු නිලධාරීන් විශාල සංඛ්‍යාවක් දහදිය වගුරුවමින් විදුලි පංකා ක්‍රියා විරහිත දුම්රිය වලම ගමන් කිරීමය.

විදුලි පංකාව ක්‍රියාත්මක කිරීම සඳහා ස්විචය දමනා මගීන්ද පංකාව ක්‍රියාත්මක නොවන බව දුටු විට නැවත ස්විචය විසන්ධි නොකොට එසේම තිබෙන්නට හරිති. එයින් රත්වීමට ලක් වන පංකාව පිලිස්සී යයි. පංකාව පිලිස්සී යන ලෙසින් වගකීම් විරහිතව කටයුතු කරනා මගීන් ද අමනයන් නොවන්නේද?

අවසානයේ සිදු වන්නේ රුපියල් අසුවකින් පිළිසකර කරහැකි රුපියල් දස දහසක් පමණ වටිනා උපකරණයක් විනාශ වී යාමය එනම් පංකාව පිළිසකර කිරීමට යන මුදල මෙන් එකසිය විසිපස් ගුණයක විනාශයක් සිදුවීමය.

නැවත පංකා සවි කිරීමට මුදල් යෙදවෙනුයේ ජනතාවගෙන් අයකරගන්නා බදු මුදල් වලිනි.  ජනතාවගේ ආදායමෙන් අධික බදු අයකරගන්නා විට දුප්පත් කම ඇති නොවන්නේද?

එනම් විදුලි පංකා නැවත සවිකිරීම නිසා බදු වැඩි වී ඇතිවන දුප්පතා කමට හේතුව වන්නේ දුම්රිය නිලධාරීන් සහ මගීන් යන දෙපිරිසේම අමන කම නොවන්නේද?

Tuesday, July 11, 2017

ජපන් කර්මාන්ත ආර්ථිකය දියුණු වූ හැටි සහ ලංකාව වලපල්ලට ගිය හැටි

ජපානය දියුණු රටක් බවට වුයේ දෙවන ලෝක යුද්ධය අවසානයේ බිමටම සමතලා වීමෙන් පසුව බව සැම දෙනාම දන්නා කරුණකි. නමුත් ජපානයේ තාක්ෂණික කර්මාන්ත ආරම්භ වුයේ දෙවන ලෝක යුද්ධයට බොහෝ කලකට පෙරය. එරට රථ වාහන නිෂ්පාදනයේ ඉතිහාසය 1912 - 1926 අතර පැවති ටයිෂෝ යුගය (Taisho Era) තෙක් දිව යයි. පළමු ලෝක යුද්ධයෙන් අනතුරුව රජයේ සහ හමුදාවේ අවශ්‍යතාව මත විවිධ නිෂ්පාදකයන් විසින් යුධ ට්‍රක් රථ නිෂ්පාදනය, ජපන් වාහන නිෂ්පාදන කර්මාතයේ ආරම්භයයි. 

වාහන නිෂ්පාදන එලෙසින ආරම්භ වු පසුව නිසාන් සහ ටොයෝටා සමාගම් විසින් ගෘහස්ථ රථ නිෂ්පාදනය ආරම්භ කළහ. වසර 1933 දී නිහොන් සන්ග්යෝ (Nihon Sangyo) විසින් නිසාන් කර්මාන්ත ශාලාව ආරම්භ කරනා ලද අතර ටොයෝටා නම්වූ රෙදි නිෂ්පාදන යන්ත්‍රෝපකරණ නිෂ්පාදකයා විසින් එම වසරේදීම සිය වාහන නිෂ්පාදන අංශය ආරම්භ කළේය. 

කෙසේ වෙතත් දෙවන ලෝක යුද්ධ සමයේදී ජපන් ගෘහස්ථ වාහන නිෂ්පාදන කර්මාන්තය වැඩි දියුණුවක් පෙන්නුම් නොකළේය. එම කාල සීමාව තුල නිෂ්පාදනය වුයේ යුධ ට්‍රක් රථ, ප්‍රවාහන ට්‍රක් රථ සහ බස් රථ පමණි. දෙවන ලෝක යුද්ධයෙන් අනතුරුව 1950 වසර වනතෙක් වසර පහක කාලසීමාවකට ජපන් රථ වාහන නිෂ්පාදන කර්මාන්තය මිත්‍ර හමුදා යුධ මුලස්ථානය විසින් තහනම් කර තිබිණ. තහනම අවසානයේ ටොයෝටා සහ නිසාන් නැවත සිය නිෂ්පාදනය ආරම්භ කළහ.

වසර 1950 සිට ජපානය විවිධාකාර නිෂ්පාදන රැසක් ආරම්භ කරමින් සුවිසල් ආර්ථික දියුණුවක් ලබා ගත්තේය. යුද්ධයට පෙර විවිධ නිෂ්පාදන සඳහා තිබූ අපනයන වෙළෙඳ පොළ වෙත නැවත රිංගා ගැනීමට මේ කාලය තුල ජපන් නිෂ්පාදකයා සමත් විය. රෙදි පිලි, පිගන් බඩු සහ ඔරලෝසු වැනි විවිධ භාන්ඩ සඳහා විදෙස් වෙළෙඳ පොළ ඉතා සුළු කාල සීමාවක් තුල ජපන් නිෂ්පාදකයා  ජය ගත්තේය. එවැනි නිෂ්පාදන පමණක් නොව දේශීය මෙන්ම විදෙස් වෙළෙඳ පොළ සඳහා විදුලි උපකරණද සුළු පරිමාණයෙන් නිෂ්පාදනය වින.

විදේශීය වෙළෙඳ පොළ ඉලක්ක කරගත් නිෂ්පාදන මගින් විදේශ විනිමය රට තුලට ගලා ගෙන එන්නට වූ වහාම ජපන් ආර්ථිකය ස්ථාවර වන්නට පටන් ගත්තේය. මේ නිසා රටේ ජනතාවගේ මිලදී ගැනීමේ හැකියාව වර්ධනය වූ අතර ඔවුන් විසින් ශීතකරණ, රෙදි සේදීමේ යන්ත්‍ර, විදුලි පංකා, ට්‍රාන්සිස්ටර් රේඩියෝ වැනි විදුලි උපකරණ මිලදී ගැනීමට පෙළඹුණි. මේ නිසා ජපානය තුල විදුලි උපකරණ නිෂ්පාදනය ඉමහත් දියුණුවට පත් වින.

මේ කාල  වකවානුව තුල ශ්‍රී ලංකාවේ සිදුවුයේ කුමක්ද?

නිදහස ලබනා කාලය වනවිට ලංකාව මුළුමනින්ම කෘෂි ආර්ථිකය මත රඳා පැවතිණ. කර්මාන්ත ශාලා පැවතියේ තේ රබර් සහ පොල් නිෂ්පාදනය වෙනුවෙන් පමණි. වෙනත් නිෂ්පාදන කෙරෙහි මෙරට පාලනය කරනා ලද ඉංග්‍රීසි ජාතිකයන්  සිත යොමු නොකළ නමුදු ශ්‍රී ලංකාව එවකට ආසියාවේ ධනවත්ම භාණ්ඩාගාරයට හිමිකම් කීවේය. දෙවන ලෝක යුද්ධය අවසානයේ ඉංග්‍රීසින් ස්වේච්චාවෙන්ම මෙරටින් පිටවුයේ බල ලෝභී නායකයන් රැලකට රට බාර දෙමිනි. 

මේ ඊනියා නායකයන්  රට තුල නිෂ්පාදන ආර්ථිකයක් ගොඩනැංවීම කෙරෙහි කිසිදු අවධානයක් යොමු නොකරනා ලද අතර තමන් වෙත බලය රඳවා ගැනීම කෙරෙහිම පමණක් අවධානය යොමු කළහ. බල ලෝභයෙන් පෙළුණු බණ්ඩාරනායක විසින් සඟ, ගුරු, වෙද, ගොවි, කම්කරු නමින් ඊනියා පංච මහා බලවේගය බලමුළු ගන්වා සිංහල රාජ්‍ය භාෂාව බවට පත් කර, පසු කලෙක තිස් අවුරුද්දක් පුරා රට විනාශය කරා ගෙනගිය ජාතිවාදී යුද්ධයකට මග හෙළි කළේය. 

පසුව සිරිමාවෝ බණ්ඩාරනායක මැතිනිය විසින් උගත් වාමාංශික දේශපාලන නායකයන් රැසක් සමග සන්ධානගතවී සමගි පෙරමුණු රජය පිහිටවූ අතර එම රජය රට තුල නිෂ්පාදන ආර්ථිකයක් ගොඩ නැංවීමට මුල් පියවර ගත්තේය. රටක නිෂ්පාදන ආර්ථිකය ගොඩ නැංවීමට මුලික සාධකය වන යකඩ හා වානේ කර්මාන්තය, වීදුරු නිෂ්පාදනය, දැව සැකසීමේ කර්මාන්තය වැනි මහා පරිමාන කර්මාන්ත රජය විසින් ආරම්භ කරනා ලද්දහ. රට තුලට ආනයනය මුළුමනින්ම නවතා දැමූ අතර එතුලින් සුළු පරිමාන කර්මාන්ත ආරම්භය සඳහා හිතකර පරිසරයක් ගොඩ නැංවීය. උපාලි විජේවර්ධන වැනි කර්මාන්ත කරුවන් මේ අවදියේදී හිස එස වීය. 

නමුත් සමගි පෙරමුණු රජය එක තැනකදී මාරාන්තික වරදක් සිදු කළේය. එනම් එවකට රට තුල සිටි ප්‍රධාන ආයෝජකයන් වූ වැවිලි කරුවන්, වතු ජනසතුව මගින් විනාශ කර දැමීමය. මේ හේතුවෙන් රටේ ප්‍රධාන ආර්ථිකය විනාශ විය. කෙසේ වුවද රට තුල නිෂ්පාදන ආර්ථිකයක් ගොඩනැගෙමින් පැවතින. 

සංවෘත ආර්ථිකය තුල ජනතාව වෙත තිබූ පීඩනය අවස්ථාවාදී ලෙස ප්‍රයෝජනයට ගත් ජේ. ආර්. ජයවර්ධන සුවිසල් බහුතරයක් සහිත ආණ්ඩුවක් පිහිටුවීමට කටයුතු කළේය. ජනතාව වෙත දුන් චන්ද පොරොන්දුවක් වූ විවෘත ආර්ථික ප්‍රතිපත්තිය කිසිදු වග විභාගයකින් තොරව ක්‍රියාත්මක කරනා ලද්දේය. මේ හේතුවෙන් විදෙස් නිෂ්පාදන කිසිදු පාලනයකින් තොරව රට තුලට ගලාගෙන ආවේ නැගී එන දේශීය කර්මාන්ත කරුවන් වනසා දමමිණි. අවසානයේ ජේ. ආර්. ජයවර්ධන දේශපාලනයෙන් සමුගත්තේ වැරදි රාජ්‍යතාන්ත්‍රික ප්‍රතිපත්ති හේතුවෙන් රට තුල සිවිල් යුද්ධයකට මුලපුරා රට විනාශ මුඛයට ඇද දමමිනි.

දැන් සිදුව ඇත්තේ කුමක් ද?

මේ වන විට රට තුල නිෂ්පාදනය ප්‍රධාන වශයෙන් ඇඟලුම් කර්මාන්තයට සීමා වී පවතියි. කෙතරම් දියුණු ඇඟලුම් කර්මාන්තයක් තිබුනද රටේ ජනතාව චීන ඇඟලුම් භාවිතා කරනා තරම් පහත් තත්වයට පත්ව සිටිති. විදුලි උපකරණ, පරිගණක පමනක් නොව උදලු වැනි ප්‍රාථමික කෘෂි උපකරණ සහ සෙල්ලම් බඩු පවා චීනයෙන් ගෙන්වමින් රටේ ගැහැනුන් විදේශයන්හි බැලමෙහෙවර කරමින් ගෙනේ එන විදෙස් විනිමය කාබාසීනියා කර දමති. අවම වශයෙන් ත්‍රී රෝද රථයක් නිෂ්පාදනය කෙරෙහි වත් අවධානයක් යොමු කර නැත. රටම වෙහෙස වෙමින් චීනයේ නිෂ්පාදකයා පොහොසත් කරමින් සිටින්නෙමු.

Thursday, July 6, 2017

ජපානයේ කාන්තා කිමිදුම්කාරිනියන් (අමා කිමිදුම්කාරිනියන්)

ජපානය වැඩ කරන්නම උපන් මිනිසුන්ගෙන් පිරුන රටකි. එරට ලබාගෙන ඇති දියුණුවේ රහස වන්නේද එයමය. සතියේ වැඩ කරනා දින වල මාර්ගයේ ගමන් ගන්නා විට මිනිසුන් දක්නට ලැබෙනුයේ අවම වශයෙනි. ප්‍රධාන නගරවල පවා රථවාහන තදබදයක් දක්නට නොලබෙනුයේ ඒ හේතුවෙන් විය හැකිය.

ජපානයේ මියා ප්‍රාන්තය තුල විශාල ධීවර ජනතාවක් වෙසෙති. විවිධ වර්ගයේ මසුන් ඇල්ලීම සඳහා පිරිමින් බෝට්ටු වල නැගී ගැඹුරු දියඹට යාත්‍රා කරනා විට ධීවර කාන්තාවන් මුහුදේ කිමිදෙමින් ආහාරය සඳහා වන බෙල්ලන් එකතු කිරීම සඳහා වෙරල වෙත ඇදෙති.

මෙම කිමිදුම් කාරිනියන් අමා කිමිදුම් කාරිනියන් යනුවෙන් හැඳින්වෙයි. ජපානය පුරා අමා කිමිදුම් කාරිනියන් 15,000 ක ප්‍රමාණයක් වෙසෙන බව වාර්ථා ගතය. ඉන් 2000ක ප්‍රමාණයක් මියා ප්‍රාන්තයේ වෙසෙති. 

අමා කිමිදුම් කාරිනියන් වර්ග දෙකකි. ඉන් පළමුවැනි පිරිස නොගැඹුරු මුහුදේ හය දෙනෙකුට වැඩි කණ්ඩායමක් වශයෙන් එකතුවී බෙල්ලන් කැඩීමේ කාරියේ දෙනා අතර දෙවැනි පිරිස පිරිමියකු සමග ගැඹුරු මුහුදට ගොස් මීටර 20ක් වනතෙක් කිමිදී බෙල්ලන් කඩති.

රටේ නීති රීති වලට එක් අයකුට අනුකුලව බෙල්ලන් කැඩීමේ යෙදිය හැකි උපරිම කාල සීමාව විනාඩි 90කි. වරකට තත්පර 50 ක කාලයක් කිමිදෙන මේ කාන්තාවන් මුහුද පතුලෙන් විවිධ වර්ගයේ බෙල්ලන් සිය මළු වලට පුරවාගෙන ඉහලට පැමිණෙති.

මේ දිරිය කාන්තාවන් බෙල්ලන් කැඩීම සඳහා පිටත් වන්නේ උදයේම නැගිට සිය ගොවිපල වල වගාවන්ට සහ සතුනට සාත්තු කිරීමෙන් අනතුරුවය. එම කාරියටම විශේෂිත වූ කිමිදුම් කට්ටලයකින් සහ මුහුණු ආවරණයකින් සැරසෙන මේ කාන්තාවන් අතර තරුණියන් දක්නට නොලැබීම සුවිශේෂී කරුණකි. අමා කිමිදුම් කාරිනියන්ගේ සාමාන්‍ය වයස අවුරුදු 65ක් වන අතර වයස 86ක කාන්තාවක්ද  තවමත් සිය රාජකාරියේ යෙදී සිටියි. මේ පිරිස සිය රාජකාරිය වයස අවුරුදු 15 දී පටන් ගන්නා අතර එයට විශේෂිත වූ පුහුණුව ලබා ගනුයේ වැඩිහිටියන් අනුගමනය කිරීමෙනි.

අල්ලා ගනු ලබනා බෙල්ලන් සමහරුන් වෙළෙඳ පොලට ගොසින් පන පිටින් විකුණන අතර සුළු පිරිසක් ඒවා තමන් විසින් පවත්වාගෙන යනු ලබන අවන්හල් වෙත ගෙන යති. එම අවන් හල් සුවිශේෂී සංචාරක ආකර්ෂණ බවට පත්වී රටට විදේශ විනිමය රැගෙන ඒමට විශාල දායකත්වයක් දරති.

එම අවන්හල් තුල පණ පිටින් බෙල්ලන් පුළුස්සා තවත් සාම්ප්‍රදායික ආහාර සමග විශාල මිල ගණන් වලට අලවි කරයි.

අප රට තුල තරුණ පිරිස් වැඩි ආදායමක් සොයා ගෙන ජපානය වෙත විවිධ මාර්ග වලින් සංක්‍රමණය වෙති. ජපානය තුලදී ජපනුන් සමග උරෙනුර ගැටෙමින් බෙහෙවින් මහන්සි වී මුදල් උපයති. බෙහෙවින් මහන්සිවී ජීවිකාව ගෙනයන ජපනුන් සමග ඔට්ටු වන මේ තරුණයන් සිය රට තුලදී එලෙස මහන්සි වී වැඩ කරන්නේද යන්න ප්‍රශ්නාර්ථයකි.

ප.ලි. ට්‍රිප් ඇඩ්වයිසර් (TripAdvisor) විසින් ජපානය තුල සංවිධානය කරනා ලද සම්මන්ත්‍රනයක් අතරතුර ලියනා ලද්දකි  


Saturday, June 10, 2017

ඉන්දික තොටවත්ත ගෙන් ප්‍රහසන නාටකයක්.

ශ්‍රී ටීවී නාලිකාවේ ප්‍රචාරය කෙරුණු  ඡ්‍යෝතිශ්ශාස්ත්‍රඥ ඉන්දික තොටවත්ත,  මාධ්‍යවේදී චාපා බණ්ඩාර සහ වෛද්‍ය විද්‍යාකුලපති මහතුන් අතර සිදුකල දීර්ඝ සංවාදය සමාජ ජාල හරහා පසුගිය දිනවල වේගයෙන් සංසරණය විය. මේ සංවාදය අප රට තුල ගුප්ත විද්‍යා ලේබලය යටතේ සංසරණය වන මිත්‍යාව, රැවටීම, ගසාකෑම සහ වංචාව පිලිබඳ  නව මානයකින් සිතිය යුතු බොහෝ කරුණු විදහා පානු ලබයි.

අපට තේරුම් ගත නොහැකි දේ නැතැයි කියා ප්‍රතික්ෂේප කළ නොහැකිය.  මිනිස් ක්‍රියාකාරකම් මත ග්‍රහලෝක වල පිහිටීම සිදු කරනා බලපෑම උදාහරණයක් ලෙස ගනිමු. මානසික රෝගීන්ගේ රෝගී තත්වයන් සඳේ බලපෑම මත අඩු වැඩි වන බවට නිරීක්ෂණ ඇත. එබැවින් ග්‍රහලෝක වෙතින් මිනිස් මනස හෝ ශරීරය වෙත බලපෑමක් තිබිය හැක. සමහරවිට එම බලපෑම ඡ්‍යෝතිශ්ශාස්ත්‍රය තුලින් විද්‍යානුකූලව විග්‍රහ කර තිබීමට පුළුවන. එලෙසින්ම එම විග්‍රහය වැරදි වීමටද පුළුවන. ඒ සම්බන්ධව  ගැඹුරට අධ්‍යනය නොකර ඡ්‍යෝතිශ්ශාස්ත්‍රය බොරු බවට තර්ක කිරීම මුග්ධ කමකි. අපගේ බුද්ධියට හෝ දැනුමට ගෝචර නොවන නිසා එය ප්‍රතික්ෂේප කර එයට ගැරහීම කල නොහැක.

පසුගිය දශක දෙකක පමණ කාලසීමාව තුල ගුප්ත විද්‍යා සඳහා වූ ඉල්ලුම වේගයෙන් වැඩිවූ බව දක්නට ලැබෙයි.  ප්‍රධාන ධාරාවේ ජනමාධ්‍ය ගුප්ත විද්‍යා ප්‍රවර්ධනය සඳහා විශාල මැදිහත් වීමක් කර තිබේ. ඒ ඔවුන්ගේ බඩගෝස්තරය පිණිස මිස වෙනත් කරුණක් නිසා නොවේ. මැණික් හින්නේ හුලවාලියන් සමහර ජාතික පුවත්පත් අරක්ගෙන තිබු යුගයක් විය. තවමත් එසේ දැයි අප නොදන්නේ දැන් ඉරිදා පුවත් පත් මිලදී නොගන්නා නිසාය. වෙළෙඳ දැන්වීමක් ලැබෙයි නම් මේ පුවත් පත් ඕනෑම දෙයක් ප්‍රවර්ධනය කරති. ඒවා වෙත ආදී එන්නේ අසුචි ගොඩක් දුටු නිල මැස්සන් මෙනි.

මේ හේතුවෙන් ජන මාධ්‍ය තමන්ට වෙළෙඳ දැන්වීම් සපයන්නාවූ කට්ටඩියන් ගේ හිත සුව පිණිස කිසිදු වගකීමකින් හෝ සදාචාරයකින් තොරව ගුප්ත විද්‍යා ප්‍රවර්ධනය කරති. ඒ සඳහා කට්ටඩියන් අතරින් තෝරාගත් චරිත කිහිපයක් ප්‍රභූ මට්ටම වෙත ගෙනවිත් ඇත. ඉන්දික තොටවත්ත ඒ අතරින් එකෙකි. ඉන්දික තොටවත්ත යෝතිශ්ශාස්ත්‍රය හෝ අධි මානසික ශක්තිය වැනි විෂයන් වෙනුවෙන් පෙනී සිටියාට අපට කිසිදු විරෝධතාවක් නැත. විරෝධතාව ඇත්තේ එම විෂයන් දඩමීමා කරගෙන මැජික් පෙන්වා සමාජය රැවටීම කෙරෙහි පමණකි. 

ගුප්ත විද්‍යා වන්හි බලපෑම කෙතරම්ද කිවහොත් මේ කට්ටඩින් රටවල ආණ්ඩු වෙනස් කිරීමට ජනමතය වෙත බලපෑම් කළ හැකි මට්ටමටම ජනතාව අතර අතු පතර විහිදුවාගෙන ඇත. රජුන් යැයි සිතාගෙන සිටියවුන් ගොනාට අන්දවා නිකමුන් බවට පත් කර ඇත.

ශ්‍රී ටීවී නාලිකාවේ ප්‍රචාරය කෙරුණු සංවාදය වෙත නැවත හැරෙමු. එම සංවාදය පැයකට වඩා වැඩි කාලයක් පුරා විකාශය වුයේ එකම කරුණක් වටාය. එනම් ඉන්දික තොටවත්ත විසින් අධි මානසික ශක්තිය යොදවා කරනා ලදැයි කියනා කලින් පෙන්වූ මැජිකක් නැවත පෙන්වන ලෙස කරනා ලද අභියෝගයක් සහ එය මගහරවා සාකච්චාව වෙනත් අතකට හැරවීමට ඉන්දික තොටවත්ත දරනා ලද අසාර්ථක මෙන්ම අලජ්ජී උත්සහයය. 

මීට පෙර කලෙක ඉන්දික තොටවත්ත විසින් සිරස නාලිකාවේ "මල් වැඩ සටහනකට" සහභාගී වී ඔහුගේ අධිමානසික ශක්තිය විදහා දක්වා තිබිණ. එහිදී සංවෘත පෙට්ටි තුනක් තුල ඇති වස්තුන් මොනවාදැයි නිවැරදිව කියා තිබිණ. මෙවර සංවාදය තුල එය නැවත කරනා ලෙස  මාධ්‍යවේදී චාපා බණ්ඩාර විසින් පෙට්ටි තුනක් ගෙනවිත් අභියෝග කළේය. එහිදී ඉන්දික තොටවත්ත ගල උඩ රීපු බළලාගේ මට්ටමට පත්විය. ඔහු විසින් අභියෝගය මගහැරීමට විවිධ කාරනා ගෙනහැර පෑවේ ඉතාමත් අනර්ඝ ප්‍රහසන නාටකයක් ප්‍රේක්ෂකයාට ලබා දෙමිනි. ඔහුගේ රංගනය බෙහෙවින් බාල මට්ටමට පත්විය. කෙසේ හෝ අභියෝගය භාර නොගෙන ලිස්සා ගියේය. ඒ අතින් ඔහු අති දක්ෂයකු බව කිව යුතුය.

ඉන්දික තොටවත්ත හෝ වෙනත් අධි මානසික ශක්තිය ඇතැයි කියනා පුද්ගලයකු නැවතත් රුපවාහිනී වැඩසටහනකට එන්නේ නම් විද්වත් මණ්ඩලයක් ඉදිරියේ පෙට්ටි තුනේ මැජික මුලින්ම පෙන්වා සිටිය යුතුය. මේ වැඩසටහන් විකාශය කරනා රුපවාහිනී නාලිකා සදාචාරාත්මකව කටයුතු කරන්නේ නම් එය ඔවුන්ගේ වගකීමකි. මිත්‍යාවෙන් රටේ ජනතාව ගලවා ගැනීම පිණිස වෙන සමාජීය මෙහෙවරකි. එලෙස පෙන්වීමට හැකිනම් ඔවුන්ගේ අධි මානසික ශක්තිය පිළිගත හැක. නොහැකිනම් ඔවුන් අමුම අමු රැවටිලි කරුවන්ය. වංචා කරුවන්ය,

ඉතාම අනර්ඝ මට්ටමේ ප්‍රහසන නාටකයක් නැරඹීමට කැමති අය ඩේට ඩේට කියල  බලන්නේ නැතිව පහත වීඩියෝව නරඹන්න.


Tuesday, May 30, 2017

සිංහල රජකු චීනයට පැහැරගෙන ගිය ෂෙන්-හෙ නම් සෙන්පතියා

චීනයේ මිං රාජවංශයේ පාලන සමයේ විසු ෂෙන් හේ (Zheng He) දේශ ගවේෂකයකු, රාජ්‍ය තාන්ත්‍රිකයකු මෙන්ම නාවික හමුදා අද්මිරාල් වරයකු විය. මොන්ගෝලියාවේ යුනාන් හි මුස්ලිම් ආගමික පවුලක් උපන් ඔහු පසු කලෙක ආගමික සංකලනයක් (Syncretism) තුල ජීවත් විය. ඔහුගේ මුතුන් මිත්තන් පර්සියාවේ සිට මොන්ගෝලියානු අධිරාජ්‍යයේ සේවයට පැමිණියාහු වෙති. චීනයේ මිං රාජ වංශය යුනාන් ආක්‍රමණය කළ අවදියේදී චීන හමුදා විසින් එකොලොස් හැවිරිදි ෂෙන් හේ අත්අඩංගුවට ගෙන ඔහුගේ පුරුෂ ලිඟුව කපා දමා චීන අධිරාජයාගේ සතර වන පුත්‍රයා වූ "ෂූ ඩෙ" (Zhu Di) ගේ නිවසේ සේවයට යොදවා ඇත.

"යොංගල්" අධිරාජයා ලෙසින් කිරුල පලන්  ෂු ඩෙ කුමාරයා  චීන අධිරාජයා බවට පත්වීමෙන් පසුව රාජ සභාවේ ඉහළ තනතුරක් ෂෙන් හේ ට ලැබිණ. පසුව යොංගල්" අධිරාජයා විසින් පිහිටුවන ලද අති විශාල නාවික හමුදාවේ අද්මිරාල් ධුරයකට  ෂෙන් හේ පත් විණ.

චීන ජාතිකයන් විසින් වසර 1405 සහ 1433 අතර වටිනා වස්තුන් සොයා දියත් කරනා ලද නාවික මෙහෙයුම් (Treasure oyages) හතෙහි අද්මිරාල් වරයා ෂෙන් හේ විය. මින් පළමු මෙහෙයුම් තුන ඉන්දියාවේ කැලිකට් වෙත දියත් කෙරිණ. මේ කාලය තුල ආසියානු සහ අප්‍රිකානු රටවල් 30කට ඔහු සංචාරය කළ අතර කිලෝමීටර් ලක්ෂයකට වැඩි දුරක් ගමන් කළේය. ෂෙන් හේ ගේ නාවික බල ඇණිය නැව් 300ක යාත්‍රා කළ නාවිකයන් 27,000 කින් යුක්ත විය. 

ෂෙන් හේ ගේ මෙම ගවේෂණය කොලොම්බස් ඇමරිකාව සොයා ගැනීමට වසර 87 කට පෙර සිදුකරනා ලද්දක් මෙන්ම මැගලන්ගේ ලොව වටා සංචාරයට වසර 114කට පෙර සිදුකරන්න ලද්දකි. 

කොළඹ කෞතුකාගාරයේ තැන්පත්
කර ඇති ෂෙන් හේ ගේ සෙල් ලිපිය 
මෙම නාවික මෙහෙයුම් අතරතුර ෂේන් හේ විසින් සය වතාවක් ලංකාවට පය තැබූ බව කියවෙයි. ඉන් තෙවන වතාවේදී ඔහු විසින් ගාල්ලේ සෙල් ලිපියක් පිහිටුවා ඇත. 1911වසරේදී සොයාගන්නා ලද එම ලිපියහි චීන පර්ශියන් සහ දෙමල භාෂා තුනෙන් අකුරු කොටා ඇත. 

චීන භාෂාවෙන් කොටා ඇති ලිපියේ දැක්වෙන්නේ කන්දේ පිහිටි බෞද්ධ ආරාමයට ලබා දුන් පඬුරු විස්තරයයි. පර්ශියන් භාෂාවෙන් අල්ලා දෙවියනට ලබා දුන් පඬුරු සහ දෙමල භාෂාවෙන් තෙනවරයි නායනර් නම් දෙමල දෙවියනට ලබා දුන් පඬුරු පිලිබඳ ලැයිස්තුව සඳහන් වෙයි. භාෂා තුනකින් සංස්කෘති තුනක් සහ ආගමික දර්ශණ තුනක් සම්බන්ධව කරුණු හෙලිකරනා මෙම සෙල් ලිපිය චීනයේ මිං අධිරාජ්‍යයන් ගේ බහු සංස්කෘතික ලැදියාව පෙන්නුම් කරයි.

ෂෙන් හේ ගේ නැවෙහි ආකෘතියක් 
ෂෙන් හේ  ලංකාවට පැමිණෙන අවධිය වන විට මෙරට පැවතියේ ගම්පොල රාජධානි සමයයි. ශ්‍රී දන්ත දාතුන් වහන්සේ ගම්පොල රාජධානියේ වැඩසිටි බැවින් එය රටේ අග නගරය වශයෙන් සැලකුවද එසමයේ රට පුරා රාජධානි රැසක් පැවතියේය. ලංකාවේ බටහිර වෙරළේ පැවතියේ රයිගම් රාජධානියයි. රයිගම් රාජධානිය යනු ගැලණිගම, බණ්‌ඩාරගම, වීදාගම ලෙසින් මේ වනවිට හැඳින්වෙන ප්‍රදේශයයි. මෙම රයිහම් රාජධානියේ පාලකයා වීර අලකේශ්වර නම් රජෙකු බවට සද්ධර්මරත්නාකරය සාක්ෂි දරයි. තවත් මුලාශ්‍ර වල වීර අලකේශ්වර කෝට්ටේ රාජධානියේ පාලකයා බව කියවෙයි. ( මේ සම්බන්ධව ඉතිහාසය මැනවින් දන්නා පාඨකයනට කරුණු තහවුරු කරනා ලෙස ඉල්ලා සිටිමු)

ෂෙන් හේ ගේ නැව සහ කොලොම්බස් ගේ නැව
අතර සංසන්දනය
ඉන්දියාවේ කැලිකට් වරාය වෙත ගමන් කිරීමේ අරමුණින් ෂෙන් හේ ගේ නායකත්වයෙන් යුතුව වසර 1405 ජුලි මස 11 වැනි දින පිටත් වූ චීන නාවික හමුදාව ගමනේ අතරමගදී ලංකාවට ගොඩබැස ඇත. එම හමුදාව ගොඩ බට ප්‍රදේශයේ පාලකයා වූ වීර අලකේශ්වර ඔවුනට දැක්වූ විරෝධතාව හේතුවෙන් ෂෙන් හේ ප්‍රමුඛ නාවික හමුදාව ලංකාවෙන් පිටත්ව කැලිකට් වෙත ගමන් කර ඇත. 

වසර 1411දී නැවත ලංකාවට පැමිණෙන ෂෙන් හේ එවර රයිගම් රාජධානියට පහරදී වීර අලකේශ්වර රජුව චීනයට පැහැරගෙන ගොස් ඇත. ලංකාවේ වංශ කථා වන්හි මෙම සිද්ධිය නිසි ලෙස වාර්ථා වන්නේ නැත. නමුත් චීන රාජ සභාවේ එදිනෙදා කටයුතු පිලිබඳ වන  "මින් ෂිලු" (Ming Shilu) නමින් හැඳින්වෙන වාර්ථා වල වීර අලකේශ්වර සම්බන්ධ සටහන් දක්නට ලැබෙයි. 

ක්‍රි.ව. 1411 ජුලි මස 6 වැනි දින "මින් ෂිලු" වාර්ථා

  • නපුංසක "ෂෙන්-හෙ" සහ අනෙක්‌ අය විවිධ රටවල තානාපතීන් ලෙස බටහිර සමුද්‍රයට යවන ලද අතර ලංකාවෙන් අල්ලා ගන්නා ලද "යා-ලීකු-නා-යිර් (ya-lier-ku-nai-er) රජු සහ ඔහුගේ පවුලේ සාමාජිකයන් අද දින රාජ සභාවට ඉදිරිපත් කරන ලදි. පෙර දිනක "ෂෙන්-හෙ" ලංකාවට පැමිණි විට "යා-ලීකු-නා-යිර්" ඔහුට අගෞරව වන ලෙසත් අපහාසාත්මක ලෙසත් හැසිරෙන ලදී.
  • "මේ "යා-ලී කු-නා-යිර්" තමන්ගේ අසල්වැසි රටවලට සතුරු ලෙස ක්‍රියා කරන අතර ඔවුන්ගේ තානාපතිවරුන්ට බාධා පමුණුවමින් භාණ්‌ඩ සොරකම් කිරීමක්‌ කරන ලදී. ඔහුගේ මෙම ක්‍රියාවන් නිසා අපගේ මිත්‍ර රටවල් පීඩා විඳින ලදී. නැවත පසු කලෙක "ෂෙන්-හෙ" පැමිණිවිට ලංකාවේ රජු උපක්‍රමශීලී ලෙස ඔහු රට තුළට ඇතුළු කරගන්නා ලදී. මෙවිට රජු රහසිගතව පන්දහසක හමුදාවක්‌ "ෂෙන්-හෙ" බඩු කොල්ල කෑමට එවන ලදී. ඔවුන් ගස්‌ කපා දමා "ෂෙන්-හෙ"ට නැවත නැව් කරා යැමට ඉඩ නොදුන්නේය."
  • "ෂෙන්-හෙ" පුද්ගලිකවම දෙදහසක හමුදාවක්‌ සමග වෙනත් අඩි පාරක්‌ ඔස්‌සේ ගොස්‌ රාජකීය නගරයට හදිසියේ පහර දෙන ලදි. එහිදී ඔවුන් අගනුවර යටත්කරගත් අතර "යා-ලී කු-නා-යිර්", ඔහුගේ පවුලේ සාමාජිකයන් සහ නායකයන්ද, ජීවග්‍රහයෙන් අල්ලා ගන්නා ලදි. "ෂෙන්-හෙ" ඔවුන් සමග චීන රාජ සභාවට පැමිණෙන ලදී."

ක්‍රි.ව.1412 අගෝස්‌තු මස 20 වැනි දින "මින් ෂිලු" වාර්ථා

  • "යේ-බා-නේ-නා" (ye-ba-nai-na) ලංකාවේ රජු ලෙස පත්කරන ලදී. මීට ප්‍රථම "යා-ලී කු-නා-යිර්" නමැති ලංකාවේ රජු විසින් සිදුකරනලද විවිධ වැරදි ක්‍රියා නිසා අත්අඩංගුවට ගන්නා ලද අතර, අධිරාජයා විසින් ඔහු වෙනුවට ඔහුගේ ඥතියකු වන සුදුසු පුද්ගලයකු එම රටේ පාලකයා ලෙස පත් කරන ලෙස නියෝග කරන ලදි.
  • මෙම අවස්‌ථාවේ දී රැස්‌ව සිටි ඇමැතිවරුන් ඉල්ලා සිටියේ "යා-ලීකු-නා-යිර්" මරණයට පත්කරන ලෙසයි. එවිට අධිරාජයා මෙසේ පැවැසීය. මිනිසුන් සහ මිතුරන්, කුරුල්ලන් සහ සත්වයින් වැනිය. ඔවුන්ට අනවශ්‍ය ලෙස දඬුවම් දීමෙන් පලක්‌ නැත. මෙම අධිරාජයා ඔහුට සමාව දී නැවත ඔහුගේ රටට පිටත්කර යවන ලදි.

මෙලෙස චීන සහ ඉන්දියන් සාගර වල පරාක්‍රමය පෑ අද්මිරාල් ෂෙන් හේ වස්තුව සොයා ගිය හත් වන මුහුදු ගමන අවසානවී ටික කාලෙකින් 1433 වසරේදී කැලිකට් හිදී මියගිය බව කියවේ. තවත් වාර්තාවකින් කියවෙන්නේ නැන්ජිං හි නගරාරක්ෂක වශයෙන් සේවය කරමින් සිටියදී වසර 1435දී මිය ගිය බවය 

මුලාශ්‍ර 
Zheng He: A Peaceful Mariner and Diplomat <http://www.china.org.cn/english/features/zhenhe/134661.htm>

චීන සෙන්පති 'ෂෙන් හෙ' රයිගම රජු පැහැරගෙන චීනයට ගෙන යයි <http://www.divaina.com/2015/09/02/badada01.html>

Ming–Kotte War <https://en.wikipedia.org/wiki/Ming–Kotte_War>

Treasure voyages <https://en.wikipedia.org/wiki/Treasure_voyages>

Zheng He <https://en.wikipedia.org/wiki/Zheng_He>

Galle Trilingual Inscription <https://en.wikipedia.org/wiki/Galle_Trilingual_Inscription>